قازاق كوشپەندىلەرىنىڭ حIX-XX عاسىرلاردا پايدالانعان زەرگەرلىك بۇيىمدارى، ات ابزەلدەرى، تۇرمىستىق زاتتارى مەن مۋزىكالىق اسپاپتارى، جالپى قازاق ەلىنىڭ تاريحى مەن بۇگىنى يتاليادا ۇلكەن رەزونانس تۋدىردى. نەاپولداعى Castel Nuovo سارايىندا الماتى تاريحى مۋزەيى «قازاقستان كوشپەندىلەرى: تاريحى مەن بۇگىنى» حالىقارالىق كورمەسىن ۇيىمداستىردى.
ونى 10 مىڭنان استام قالا جۇرتى مەن تۋريست كەلىپ تاماشالاعان. ەندى قابىلداۋشى تاراپ وسىنداي كورمەنى يتاليانىڭ باسقا قالالارىندا دا وتكىزۋدى سۇراپ وتىر. جەرگىلىكتى باق وكىلدەرى قازاق حالقىنىڭ مادەنيەتى مەن مۋزەي قورىنىڭ باي كوللەكتسياسى كورمەگە كەلۋشىلەردى تاڭ قالدىرعانىن جارىسا جازىپ جاتىر.
كورمە بارىسىندا الماتى قالاسى مادەنيەت باسقارماسىنىڭ باسشىسى عاني مايلىباەۆ پەن قازاقستان رەسپۋبليكاسىنىڭ يتالياداعى قۇرمەتتى كونسۋلى ۆالەنتينا ماتستسانىڭ كەزدەسۋى ءوتتى، سونىمەن قاتار الماتى قالاسىنان كەلگەن دەلەگاتسيانى نەاپول قالاسىنىڭ مەرى گاەتانو مانفرەدي قابىلدادى. تاراپتار الماتى مەن نەاپول اراسىنداعى ەكىجاقتى مادەني ىنتىماقتاستىقتى ءارى قاراي دامىتۋ جانە الداعى ۋاقىتتا بىرلەسىپ كورمەلەر مەن فەستيۆالدەر وتكىزۋ مۇمكىندىگىن تالقىلادى.
«بۇل ۇلى دالا ەلى كوشپەندىلەر تۋرالى قىزىقتى كورمە ۇيىمداستىرىپ، ءوزى تۋرالى جاھانعا جار سالدى. جالپى قازاقستاننىڭ تاريحى بارلىق ورتا ازيانىڭ دامۋىن ءتۇسىنۋ ءۇشىن وتە ماڭىزدى. ءبىز بىرلەسكەن ءىس-شارالار ۇيىمداستىرىپ بارىنشا قولداۋ كورسەتۋگە دايىنبىز»، – دەپ اتاپ ءوتتى قازاقستان رەسپۋبليكاسىنىڭ يتالياداعى قۇرمەتتى كونسۋلى ۆالەنتينا ماتستسا.
ايتا كەتۋ كەرەك، كورمە كەلۋشىلەردى 14 جەلتوقسانعا دەيىن قابىلدايدى جانە كەلەسى تاقىرىپتىق باعىتتار بويىنشا شامامەن 140 مۋزەي ەكسپوناتىن ۇسىنىپ وتىر: ءداستۇرلى كيىز ءۇي بەزەندىرۋ، ات ابزەلدەرى، تۇرمىستىق زاتتار، زەرگەرلىك بۇيىمدار، مۋزىكالىق اسپاپتار.
«الماتى قالاسىنىڭ مۋزەيلەرى قالا باسشىلىعىنىڭ قولداۋىمەن حالىقارالىق دەڭگەيدە قازاق تاريحىن، مادەنيەتى مەن ءداستۇرىن، جالپى ەل فيلوسوفياسىن تانىستىرىپ، ناسيحاتتاۋ بويىنشا بەلسەندى جۇمىس اتقارىپ كەلەدى. قازىر كورمەنى يتاليادا قانشالىقتى جاقسى قابىلداعانىن كورىپ وتىرمىز، سوندىقتان وسى ەلدەگى ارىپتەستەرىمىزگە العىس ءبىلدىرىمىز. ەندى جىل سوڭىنا دەيىن ۆەنادا دا وسىنداي ۇلكەن كورمە ۇيىمداستىرۋدى جوسپارلاپ وتىرمىز», – دەپ اتاپ ءوتتى الماتى قالاسى مادەنيەت باسقارماسىنىڭ باسشىسى عاني مايلىباەۆ.
كورمەنى تاماشالاعان جەرگىلىكتى تۇرعىندار، سونىڭ ىشىندە يتاليانىڭ باق وكىلدەرى «قازاقتار – عاسىرلار بويى ءداستۇرىن نىعايتا وتىرىپ، تامىرىن تانىپ-ءبىلۋ ارقىلى مادەنيەتىن بايىتقان اسقاق حالىق»; «شىن مانىندە، الماتى ءحىىى عاسىرلاردا ۇلى جىبەك جولى تورابىنداعى ماڭىزدى ساۋدا ورتالىعى بولدى، ماڭىزدى ءرول اتقاردى»; «پايدالى قاسيەتتەرى مەن قۇندىلىعى جوعارى «زەرگەر» دەپ اتالاتىن تاماشا كۇمىس اشەكەيلەردى، سونداي-اق اڭىزعا اينالعان رۋحاني تاريحى مول دومبىرا، جەتىگەن جانە قوبىز سياقتى كونە مۋزىكالىق اسپاپتاردى مۇقيات قاراستىرعان ءجون» دەپ جازعان.
الماتى قالاسى مادەنيەت باسقارماسى
