Qazaq kóshpendileriniń HIX-XX ǵasyrlarda paıdalanǵan zergerlik buıymdary, at ábzelderi, turmystyq zattary men mýzykalyq aspaptary, jalpy qazaq eliniń tarıhy men búgini Italııada úlken rezonans týdyrdy. Neapoldaǵy Castel Nuovo saraıynda Almaty tarıhy mýzeıi «Qazaqstan kóshpendileri: tarıhy men búgini» halyqaralyq kórmesin uıymdastyrdy.
Ony 10 myńnan astam qala jurty men týrıst kelip tamashalaǵan. Endi qabyldaýshy tarap osyndaı kórmeni Italııanyń basqa qalalarynda da ótkizýdi surap otyr. Jergilikti BAQ ókilderi qazaq halqynyń mádenıeti men mýzeı qorynyń baı kollekııasy kórmege kelýshilerdi tań qaldyrǵanyn jarysa jazyp jatyr.
Kórme barysynda Almaty qalasy Mádenıet basqarmasynyń basshysy Ǵanı Maılybaev pen Qazaqstan Respýblıkasynyń Italııadaǵy Qurmetti konsýly Valentına Maanyń kezdesýi ótti, sonymen qatar Almaty qalasynan kelgen delegaııany Neapol qalasynyń meri Gaetano Manfredı qabyldady. Taraptar Almaty men Neapol arasyndaǵy ekijaqty mádenı yntymaqtastyqty ári qaraı damytý jáne aldaǵy ýaqytta birlesip kórmeler men festıvalder ótkizý múmkindigin talqylady.
«Bul Uly dala eli kóshpendiler týraly qyzyqty kórme uıymdastyryp, ózi týraly jahanǵa jar saldy. Jalpy Qazaqstannyń tarıhy barlyq Orta Azııanyń damýyn túsiný úshin óte mańyzdy. Biz birlesken is-sharalar uıymdastyryp barynsha qoldaý kórsetýge daıynbyz», – dep atap ótti Qazaqstan Respýblıkasynyń Italııadaǵy Qurmetti konsýly Valentına Maa.
Aıta ketý kerek, kórme kelýshilerdi 14 jeltoqsanǵa deıin qabyldaıdy jáne kelesi taqyryptyq baǵyttar boıynsha shamamen 140 mýzeı eksponatyn usynyp otyr: dástúrli kıiz úı bezendirý, at ábzelderi, turmystyq zattar, zergerlik buıymdar, mýzykalyq aspaptar.
«Almaty qalasynyń mýzeıleri qala basshylyǵynyń qoldaýymen halyqaralyq deńgeıde qazaq tarıhyn, mádenıeti men dástúrin, jalpy el fılosofııasyn tanystyryp, nasıhattaý boıynsha belsendi jumys atqaryp keledi. Qazir kórmeni Italııada qanshalyqty jaqsy qabyldaǵanyn kórip otyrmyz, sondyqtan osy eldegi áriptesterimizge alǵys bildirimiz. Endi jyl sońyna deıin Venada da osyndaı úlken kórme uıymdastyrýdy josparlap otyrmyz», – dep atap ótti Almaty qalasy Mádenıet basqarmasynyń basshysy Ǵanı Maılybaev.
Kórmeni tamashalaǵan jergilikti turǵyndar, sonyń ishinde Italııanyń BAQ ókilderi «Qazaqtar – ǵasyrlar boıy dástúrin nyǵaıta otyryp, tamyryn tanyp-bilý arqyly mádenıetin baıytqan asqaq halyq»; «Shyn máninde, Almaty HIII ǵasyrlarda Uly Jibek joly torabyndaǵy mańyzdy saýda ortalyǵy boldy, mańyzdy ról atqardy»; «Paıdaly qasıetteri men qundylyǵy joǵary «zerger» dep atalatyn tamasha kúmis áshekeılerdi, sondaı-aq ańyzǵa aınalǵan rýhanı tarıhy mol dombyra, jetigen jáne qobyz sııaqty kóne mýzykalyq aspaptardy muqııat qarastyrǵan jón» dep jazǵan.
Almaty qalasy Mádenıet basqarmasy
