الماتى وبلىسىندا اسكەردە كوز جۇمعان الماس شاكىموۆتىڭ دەنەسىنە تۋىستارى ەكسگۋماتسيا جاساتتى، دەپ حابارلايدى “ادىرنا” ءتىلشىسى كتك-عا سىلتەپ.
وتان الدىنداعى بورىشىن وتەۋگە ءوزى سۇرانىپ بارعان كوكشەتاۋلىق جىگىتتىڭ ءولىمى قاتتى داۋىلدان بولدى دەيدى جاۋاپتىلار. الايدا مارقۇمنىڭ تۋىستارى كىسى قولىنان ولگەنىن قالايدا دالەلدەيمىز دەپ بەكىنگەن.
“الماتىنىڭ اسكەري پروكۋراتۋراسىنان ادىلدىك بولمادى. ءوزىمىزدىڭ باس پروكۋراتۋراعا، استانانىڭ اسكەري پروكۋراتۋراسىنا، بارىنە باردىق. بارىنەن دە ادىلدىك، شىندىق بولمادى. وزىمىزگە قارسى شىعىپ ءىستى جاپپاقشى بولدى”، – دەيدى ساربازدىڭ اجەسى كۇلمايدا تۋعانباەۆا.
مۇردەنى قارا جەردەن قازىپ الۋعا تاۋەكەل ەتكەن ساربازدىڭ ەت-جاقىندارى ونىڭ دەنەسىندە ساۋ جەرى بولماعانىن ايتادى. يىعى، ەكى اياعى، اياق سىنعان، سانىنا شەگە تىققان، باسى جارىلعان.
"مۇنىڭ بارلىعى اسكەردەگى الىمجەتتىك، الماستىڭ اجالى ادام قولىنان بولدى", دەيدى تۋعان-تۋىسقاندارى.
19 جاستاعى الماس شاكىموۆ ەسىمدى ازامات الماتى ىرگەسىندەگى پوليگونداردىڭ بىرىندە اسكەري جاتتىعۋ كەزىندە قۇمدى داۋىل باستالىپ، وزگە ساربازداردى قۇتقارىپ جاتقاندا مەرت بولعان.
اسكەري باسشىلىعى ونىڭ باسىنا تەمىر قۇراستىرمالى پالاتكا قۇلادى دەپ راپورت بەرگەنىن ەسكە سالامىز.
