فرانتسيادا مۇسىلمان بالالارى ءبىلىم الاتىن جەتەكشى ءبىلىم بەرۋ مەكەمەلەرىنىڭ ءبىرى - اۆەرروەس ليتسەيىمەن (يبني ريۋشد) تۇركيا ەلى اراسىنداعى مەملەكەتتىك كەلىسىمشارت جويىلدى، دەپ حابارلايدى «ادىرنا» ۇلتتىق پورتالى Anadolu Ajansı سايتىنا سىلتەمە جاساپ.
مالىمەتتەرگە سۇيەنسەك، ءتيىستى شەشىمدى فرانتسيانىڭ و-دە-فرانتسيا گۋبەرناتورى دجوردج-فرانسۋا لەكلەرك قابىلداعان.
لەكلەرك بۇل شەشىمىن ليتسەيدە بەرىلگەن وقىتۋ جۇيەسىن فرانتسيانىڭ ۇلتتىق ءبىلىم مينيسترلىگىنىڭ وقۋ جوسپارىنا «تولىق سايكەس كەلمەيدى» دەپ ءتۇسىندىردى. ايماق بيلىگى وقۋ باعدارلاماسىندا «مادەنيەت، گەندەرارالىق قاتىناستار، گوموسەكسۋاليزم» سياقتى تاقىرىپتار بويىنشا رەسۋرستاردىڭ تاپشىلىعىن اتاپ ءوتتى.
سونداي-اق ولار وقۋ باعدارلاماسىندا يسلام تۋرالى اقپارات كولەمى باسقا دىندەرگە قاتىستى تاقىرىپتارعا قاراعاندا باسىم دەپ سانايدى. و-دە-فرانتسيا بيلىگىنىڭ پىكىرىنشە، ليتسەيدە جۇمىس ىستەيتىن كەيبىر مۇعالىمدەر «رەسپۋبليكالىق قۇندىلىقتارعا قارسى». شەشىم ليتسەيدىڭ تۇراقتى وقىتۋشىلارىن جانە جىلدىق بيۋدجەتتەن جارتى ميلليون ەۋرو مەملەكەتتىك كومەكتى جوعالتۋىنا اكەلەدى.
قاراشا ايىندا و-دە-فرانتسيا گۋبەرناتورىنىڭ نۇسقاۋىمەن جينالعان ارنايى ءبىلىم بەرۋ جونىندەگى كونسۋلتاتيۆتىك كوميسسيا 2008 جىلى مەكتەپپەن جاسالعان كەلىسىمشارتتى بۇزۋعا داۋىس بەردى.
ءبىلىم بەرۋ مەكەمەسى ليلل قالاسىندا ورنالاسقان. ليتسەي 2003 جىلى جۇمىس ىستەي باستاعان جانە حيدجاب تاعىپ جۇرگەندىكتەن باسقا وقۋ ورىندارىنا بارا المايتىن مۇسىلماندارعا ءبىرىنشى بولىپ ەسىگىن ايقارا اشتى. ايتا كەتەرلىگى، اۆەرروەس تۇلەكتەرىنىڭ جوعارى وقۋ ورىندارىنا ءتۇسۋىنىڭ تابىستىلىق كورسەتكىشى 90 پايىزدان اسادى.
بۇگىنگى تاڭدا اۆەرروەس ورتا مەكتەبى مەن ليتسەيىندە 800-دەن استام وقۋشى وقيدى.
«ادىرنا» ۇلتتىق پورتالى
