بۇگىن ەلىمىزدىڭ بىرنەشە ايماعىندا اۋا رايىنىڭ قولايسىزدىعىنا بايلانىستى مەكتەپتەر قاشىقتان وقىتۋ فورماتىنا اۋىستىرىلدى، دەپ حابارلايدى "ادىرنا" ۇلتتىق پورتالى.
استانا قالاسىندا 0-دەن 9-سىنىپقا دەيىنگى 1-اۋىسىمداعى وقۋشىلار ونلاين وقۋعا كوشتى. بۇل تۋرالى رەسمي حابارلامانى استانا قالاسى اكىمدىگىنىڭ مونيتورينگ جانە جەدەل ارەكەت ەتۋ ورتالىعى سەيسەنبى كەشىندە تاراتتى.
"2025 جىلدىڭ 22 قاڭتارىندا اۋا رايىنىڭ قولايسىزدىعىنا بايلانىستى 1-اۋىسىمداعى 0-9 سىنىپ وقۋشىلارى قاشىقتان وقىتۋ فورماتىنا كوشەدى", – دەلىنگەن حابارلامادا.
پاۆلودار وبلىسىندا دا قولايسىز اۋا رايىنا بايلانىستى وقۋشىلار قاشىقتان وقىتۋ فورماتىنا اۋىستىرىلدى.
قاتتى جەلدىڭ كۇشەيۋىنە (ەكپىنى 21 م/س دەيىن) بايلانىستى اقسۋ قالاسى مەن اۋىلدىق ايماقتا 2025 جىلدىڭ 22 قاڭتارىندا 1-اۋىسىمداعى 0-4 سىنىپ وقۋشىلارى قاشىقتان وقىتۋ فورماتىنا كوشىرىلدى. بۇل 3123 بالانى قامتيدى. وسىعان بايلانىستى مەكتەپكە جەتكىزۋ توقتاتىلدى.
سونداي-اق پاۆلودار قالاسىنداعى مەكتەپتەردىڭ 1-اۋىسىمداعى ساباعى توقتاتىلدى. مەكتەپكە دەيىنگى جانە 1-11 سىنىپ وقۋشىلارى قاشىقتان وقىتۋعا جىبەرىلدى.
بۇل شەكتەۋلەر 9-سىنىپ بازاسىندا وقيتىن 1-2 كۋرس پاۆلودارلىق ستۋدەنتتەرىنە دە قاتىستى. اباي وبلىسىندا دا قولايسىز اۋا رايىنا بايلانىستى 1-اۋىسىمداعى وقۋشىلار ءۇشىن ساباقتار توقتاتىلدى.
ۇقساس جاڭالىقتار
