دەپۋتات دانيار قاسقاراۋوۆ بىردەن ءۇش مينيسترلىككە دەپۋتاتتىق ساۋال جولداپ، ەلدەگى ينتەرنەت-الاياقتارعا الدانعانداردىڭ مۇڭىن ايتتى، دەپ جازادى "ادىرنا" ۇلتتىق پورتالى. ول ماسەلەنى ىشكى ىستەر، تسيفرلىق دامۋ جانە ادىلەت مينيسترلەرىنە قاراستىرۋعا شاقىردى.
قاسقاراۋوۆ ينتەرنەت الاياقتارعا قانشا جەردەن توسقاۋىل قويىلعانىمەن، ولاردىڭ ايلاسى اسىپ تۇرعانىن ايتتى. ءالى كۇنگە دەيىن ءارتۇرلى تەلەگرامم چاتتار ارقىلى قوماقتى اقشا تابىڭىز دەپ، تالاي ۇيدە وتىرعان انالاردى الداپ كەلە جاتقانداردىڭ سانى كۇن ساناپ ءوسىپ جاتقانىن قوستى ول.
"ىشكى ىستەر مينيسترلىگىمەن قىلمىستىق ىستەر قوزعالادى، بىراق الاياقتىڭ ءوزىن تابۋ مۇمكىن ەمەس بولىپ وتىر. سوڭعى اقپاراتتارعا سايكەس توعىز ايدا ەلىمىزدە 15 مىڭ ينتەرنەت الاياقتىق تىركەلىپتى. ونىڭ ىشىندە، 3 مىڭنان استامى رەسمي بانكتەردىڭ اتىن جامىلىپ ازاماتتاردى الداعان. وسى جەردە ناقتى ساۋال تۋىندايدى. وزدەرىنىڭ قۇرىعىنا تۇسىرەتىن الاياقتار ازاماتتاردىڭ جەكە دەرەكتەرىن، تەلەفون نومىرلەرىن قايدان الادى؟! ولارعا بۇل دەرەكتەردى كىم بەرەدى؟ قانشا جەردەن ادامداردىڭ جەكە دەرەكتەرىن زاڭمەن قورعاپ، ونىڭ تارالۋىن شەكتەسەك تە. الاياقتار توقتايتىن ەمەس. جەكە دەرەكتەردىڭ قۇپيالىلىعى ەشكىمدە قۇپيا بولماي تۇر" دەدى ول.
ول ءوزىنىڭ ومىرىندە بولعان وقيعادان مىسال كەلتىردى:
ء"بىر عانا مىسال كەلتىرەيىن. ماسەلەن، جاقىندا ءبىر تانىسىم جەكە كومپانياسىن اشىپ، قۇجاتتارىن ەگوۆ ەلەكتروندى ۇكىمەتى ارقىلى تىركەتتى. بۇل پروتسەسس ەشكىمنىڭ قاتىسۋىنسىز، تەك پورتالدا جاسالدى. دەگەنمەن، سول كۇنى وعان ءۇش بىردەي بانكتەن قوڭىراۋ ءتۇسىپ، ارنايى ەسەپتىك شوت اشىڭىز دەگەن ۇسىنىس تۇستكەن. ال، ەرتەسى كۇنى زاڭگەرلىك-بۋحگالتەرلىك قىزمەت كورسەتەتىن جەكە كومپانيا وكىلدەرى حابارلاسىپ، ءوز قىزمەتتەرىن ۇسىنعان. ەڭ سوراقىسى، ەندى جەكە تاكسوپارك وكىلدەرى تىنىمسىز حابارلاسىپ كولىك قىزمەتىن ۇسىنىپ وتىر ەكەن. بۇنىڭ ءبارى نەبارى 2-3 كۇندە ورىن العان جاعداي" دەپ قوستى ماجىلىسمەن.
سونداي-اق، دەپۋتات بۋحگالتەرلىك كومپانيالار مەن تاكسوپارك وكىلدەرىنىڭ قولىنا تۇسكەن اقپارات الاياقتاردا دا جوق دەگەنگە كەپىلدىك جوقتىعىنا كۇمان كەلتىردى.
