باكۋ مەن ەرەۆان ازەربايجان شەكاراسىنداعى قازاق اۋدانىندا تۇتقىن الماستى. بۇل تۋرالى ازەربايجاننىڭ اسكەري تۇقىندار، كەپىلگە الىنعاندار مەن ءىز-ءتۇزسىز جوعالعاندار جونىندەگى مەملەكەتتىك كوميسسياسى راستادى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
اقپاراتقا سۇيەنسەك، ەكىجاقتى كەلىسىم اياسىندا ازەربايجان تۇتقىندالعان 32 ارميان ساربازىن بوساتقان. ولاردىڭ 26-سى 2020 جىلدىڭ جەلتوقسانىندا گادرۋت اۋدانىندا ۇستالعان بولاتىن، قالعان 6-ۋى شەكارادا ءارتۇرلى ۋاقىتتا قولعا تۇسكەن.
ارمەنيا تاراپى ەكى ازەربايجاندىق سارباز گۋسەين احۋندوۆ پەن اگشين بابيروۆتى بوساتتى.
ازەربايجاندىق باق وكىلدەرى تۇتقىن الماسۋ ەشقانداي توسىن ارەكەتسىز وتكەنىن جانە ەكى تاراپ تا قاجەتتى حاتتاما تالاپتارىن مۇلتىكسىز ورىنداعان جازۋدا.
حالىقارالىق قىزىل كرەست كوميتەتىنىڭ وكىلدەرى تۇتقىنداعى ساربازداردىڭ دەنساۋلىعى مەن جالپى جاعدايىن باعالادى.
اسكەريى قىزمەتشىلەر اگشين بابيروۆ پەن گۋسەين احۋندوۆ 9 ءساۋىر كۇنى ناحچىۆان اۆتونوميالى رەسپۋبليكاسىندا ارمەنيامەن شارتتى شەكارادا كۇن بۇزىلىپ، اينالاداعى كورىنىستىڭ قيىنداۋىنا بايلانىستى ءىز-ءتۇزسىز جوعالىپ كەتكەن بولاتىن.
8 مامىر كۇنى ارميان سوتى اگشين بابيروۆتى 11 جىل 6 ايعا باس وستاندىعىنان ايىردى. كەيىنىرەك، 21 ماۋسىمدا گۋسەين احۋندوۆ 20 جىعا سوتتالدى، دەپ حابارلادى ازەربايجاندىق media.az پورتالى.
جەلتوقسان ايىنىڭ باسىندا ازەربايجان پرەزيدەنتىنىڭ اكىمشىلىگى مەن ارمەنيا پرەمەر-ءمينيسترىنىڭ اپپاراتى بىرلەسكەن مالىمدەمە جاسادى.
«گۋمانيزم ۇستانىمدارى نەگىزىندە ازەربايجان رەسپۋبليكاسى 32 ارميان اسكەري قىزمەتشىسىن ال ارميان رەسپۋبليكاسى ەكى ازەربايجان ساربازىن بوساتادى»،-دەلىنگەن مالىمدەمەدە.
جالپى العاندا بىرلەسىپ جاسالعان قۇجات نەگىزىندە باكۋ مەن ەرەۆان ءوزارا قارىم-قاتىناستى رەتتەپ، بەيبىت كەلىسىمگە كەلگەندەرىن راستادى.
