اقش ۋكراينادان كومەكسىز كەتە المايدى. بۇل تۋرالى اقش پرەزيدەنتى دجو بايدەن ۆاشينگتوندا ۆلاديمير زەلەنسكيمەن بىرلەسكەن كونفەرەنتسيادا ايتتى، دەپ حابارلايدى “ادىرنا” ۇلتتىق پورتالى.
«امەريكالىقتار ۋكراينانىڭ جەتىستىكتەرىن قولداۋداعى ءرولىن ماقتان تۇتۋى كەرەك. ءبىز ۋكراينانى مۇمكىندىگىنشە قاجەتتى تەحنيكا مەن قارۋ-جاراقپەن قامتاماسىز ەتۋدى جالعاستىرامىز»، - دەدى ول.
ونىڭ ايتۋىنشا، رەسەي اقش-تىڭ ۋكرايناعا كومەكتەسە المايتىندىعىنا ءباس تىككەن. «سوندىقتان ءبىز ونىڭ (رەسەي پرەزيدەنتى ۆلاديمير ءپۋتيننىڭ) قاتەلەسكەنىن دالەلدەۋىمىز كەرەك. اقش كونگرەسى قولداۋ كورسەتۋى كەرەك. ءبىز بۇل جاعدايعا بۇكىل الەمدە قالاي قارايتىنىن، رەسەيدىڭ ونى قالاي پايدالانىپ جاتقانىن ءتۇسىنۋىمىز كەرەك»، - دەدى اق ءۇي باسشىسى.
وسىعان بايلانىستى بايدەن اقش كونگرەسى ۋكرايناعا قوسىمشا قارجى ءبولۋدى ماقۇلداۋى ءتيىس ەكەنىن اتاپ ءوتتى.
ۆلاديمير زەلەنسكي ءوز كەزەگىندە ۋكراينا قارۋلى كۇشتەرى سوعىس باسىنان بەرى رەسەيلىك اسكەرلەر باسىپ العان اۋماقتاردىڭ 50 پايىزىنا باقىلاۋدى قايتارىپ العانىن، سونىمەن قاتار قارا تەڭىزدە تابىسقا قول جەتكىزە العانىن اتاپ ءوتتى. «ءبىز اسپاندا ارتىقشىلىققا يە بولعىمىز كەلەدى، بۇل 2024 جىلى ءبىزدىڭ پوزيتسيامىزدى نىعايتادى. «اسپاندى باسقاراتىن ادام سوعىستىڭ ۇزاقتىعىن باسقارادى»، - دەدى ول.
ۋكراينا پرەزيدەنتى دەموكراتتار مەن رەسپۋبليكاشىلدار وعان تولىق قولداۋ كورسەتەتىنىنە سەندىرگەنىن ايتتى.
«بۇگىن مەن ەكى پارتيانىڭ وكىلدەرىمەن كوپ سويلەستىم: دەموكراتتار دا، رەسپۋبليكاشىلار دا بىزگە تولىق قولداۋ كورسەتەتىنىنە سەندىردى. ەندى كورەيىك. بىراق بۇعان دەيىن ءبىز ارقاشان ستراتەگيالىق ارىپتەسىمىز اقش-تىڭ قولداۋىنا سەنەتىنبىز»، - دەدى ول.
