اقش قارجى مينيسترلىگى مەن مەملەكەتتىك دەپارتامەنت رەسەيگە ۋكرايناداعى قاقتىعىستى جالعاستىرۋ ءۇشىن پايدالانىلعان قۇرال-جابدىقتار مەن رەسۋرستاردى جەتكىزۋگە بايلانىستى جەكە جانە زاڭدى تۇلعالاردىڭ سانكتسيالىق ءتىزىمىن كەڭەيتتى. بۇل تۋرالى اقش قارجى مينيسترلىگىنىڭ رەسمي سايتى جاريالادى، دەپ حابارلايدى “ادىرنا” ۇلتتىق پورتالى.
امەريكانىڭ قارجى مينيسترلىگى رەسەيدىڭ اسكەري-ونەركاسىپتىك بازاسىن قامتاماسىز ەتەتىن 150-دەن استام جەكە جانە زاڭدى تۇلعالارعا، ال مەملەكەتتىك دەپارتامەنت 100-دەن استام زاڭدى جانە جەكە تۇلعالارعا، سونىڭ ىشىندە ءۇشىنشى ەلدەر ارقىلى سانكتسيالاردان جالتارعاندارعا قارسى سانكتسيالار ەنگىزدى.
«كرەمل تۇراقتى تۇردە رەسەيدى سوعىس ۋاقىتىنداعى ەكونوميكاعا اينالدىرۋدا، بىراق ءپۋتيننىڭ سوعىس ماشيناسى تەك وتاندىق وندىرىسپەن ءومىر سۇرە المايدى. بۇگىنگى ءبىزدىڭ سانكتسيالارىمىز رەسەيگە ءوزىنىڭ اسكەري ونەركاسىپتىك بازاسىن قۇرۋ جانە قولداۋ ءۇشىن وتە قاجەت رەسۋرستارمەن قامتاماسىز ەتەتىن ءۇشىنشى تاراپ جەتكىزۋشىلەرى مەن جەلىلەرىنە باقىلاۋدى كۇشەيتۋدى جالعاستىرۋدا»، - دەدى اقش قارجى ءمينيسترى دجانەت ل. يەللەن مالىمدەمەسىندە.
جاڭا سانكتسيا تىزىمىنە رەسەي، قىتاي، ءباا، تۇركيا، سينگاپۋر، مالديۆ ارالدارى جانە كيپر وكىلدەرىمەن بىرگە قىرعىزستان مەن تاجىكستان وكىلدەرى كىردى.
قىرعىزستاننان كەلگەن Weitmann Handeln Allianz (Weitmann) كومپانياسى شەتەلدىك كليەنتتەرگە، سونىڭ ىشىندە رەسەيلىكتەرگە جەتكىزۋ، لوگيستيكا جانە كەدەندىك رەسىمدەۋ بويىنشا قىزمەتتەردى اتقارادى. اتاپ ايتقاندا، كومپانيا رەسەيگە دەرەكتەردى اۆتوماتتى تۇردە وڭدەيتىن كومپيۋتەرلەر مەن ديسكىلەردى ساقتاۋ قۇرىلعىلارىنىڭ جۇزدەگەن پارتياسىن جىبەردى.
ال تاجىكستاندىق «كافولاتي كوميل» كومپانياسى ءباا ارقىلى رەسەيگە شەتەلدىك اۆياتسيانىڭ قوسالقى بولشەكتەرىن جونەلتكەنى ءۇشىن سانكتسياعا ۇشىرادى.
