بۇگىن الماتىدا "جاڭا قازاق ادەبيەتى" جوباسى اياسىندا جارىق كورگەن كىتاپتاردىڭ تۇساۋكەسەر ءراسىمى ءوتتى. ىس-شارانى قر مادەنيەت جانە اقپارات مينيسترلىگى مەن قر مەملەكەتتىك كىتاپ پالاتاسى ۇيىمداستىردى، دەپ حابارلايدى “ادىرنا” ۇلتتىق پورتالى.
ايتۋلى جيىنعا قازاقستان رەسپۋبليكاسى مادەنيەت جانە اقپارات ۆيتسە-ءمينيسترى ارمان جۇدەباەۆ، قازاقستان جازۋشىلار وداعى باسقارما توراعاسىنىڭ ورىنباسارى نۇرجان قۋانتاي جانە قوعام قايراتكەرلەرى، بەلگىلى قالامگەرلەر، مەملەكەتتىك باعدارلامامەن جارىققا شىققان كىتاپ اۆتورلارى مەن كىتاپتى شىعارۋشى باسپاگەرلەر، كىتاپحانا قىزمەتكەر قاتىستى.
"مەملەكەت باسشىسى تۇركىستاندا وتكەن ۇلتتىق قۇرىلتايدا كىتاپ يندۋسترياسىن دامىتۋعا باسا نازار اۋدارعانى بەلگىلى. «جاڭا قازاق ادەبيەتى» سەرياسىمەن شىققان كىتاپتاردىڭ تۇساۋكەسەرى مەملەكەت باسشىسىنىڭ تاپسىرماسىن ىسكە اسىرۋداعى ۇلكەن قادامداردىڭ ءبىرى. بۇل سەريامەن بۇرىن جارىق كورمەگەن، ادەبيەتكە تىڭ سەرپىن بەرگەن جانە قازاق ادەبيەتىنىڭ جاڭا كەلبەتىن قالىپتاستىرۋدا ايرىقشا ورىن الاتىن ادەبيەتتەر باسىلىپ شىعاتىنى بارشاڭىزعا ءمالىم. جاڭا قازاق ادەبيەتى وكىلدەرىن قولداۋ مينيسترلىكتىڭ ءاردايىم نازارىندا"- دەدى ارمان جۇدەباەۆ.
«جاڭا قازاق ادەبيەتى» جوباسى «ادەبيەتتىڭ الەۋمەتتىك ماڭىزدى تۇرلەرىن ساتىپ الۋ، باسىپ شىعارۋ جانە تاراتۋ» رەسپۋبليكالىق بيۋدجەتتىك باعدارلاماسى اياسىندا وتكەن جىلدان بەرى قولعا الىنعان بىرەگەي باستاما. 2022 جىلى وسى باعدارلامامەن 10 اۆتوردىڭ كىتابى جارىق كورىپ، ارقايسى 3 مىڭ دانامەن ەلىمىزدىڭ تۇپكىر-تۇپكىرىنە جەتكىزىلدى.
بيىل جارىققا شىققان 14 كىتاپتىڭ بارلىعى دا ەلىمىزدەگى كىتاپحانالاردىڭ قورىن تولىقتىرادى.
جيىن بارىسىندا ءىس-شاراعا قاتىسۋشىلار قازىرگى قازاق ادەبيەتىنىڭ وزەكتى ماسەلەلەرىن تالقىلادى.
