سانجار تايجان نەگىزىن قالاعان باتارەيالىق ستارتاپ لوندوندا وتكەن «Move 2025» حالىقارالىق كونفەرەنتسياسىندا ۇزدىك دەپ تانىلدى، دەپ حابارلايدى "ادىرنا" ۇلتتىق پورتالى.
سانجار تايجاننىڭ جوباسى 200-دەن استام ستارتاپتىڭ ىشىنەن وزىپ شىعىپ، «2025 جىلدىڭ ستارتاپى» اتاعىنا يە بولدى.
«Move» كونفەرەنتسياسى – كولىك جانە بولاشاق موبيلدىلىك تەحنولوگيالارىنا ارنالعان الەمدەگى ەڭ ءىرى فورۋمداردىڭ ءبىرى.
بيىلعى شاراعا 5 000-نان استام قاتىسۋشى جينالىپ، Mercedes-Benz, BMW, Hyundai سىندى الپاۋىت كومپانيالاردىڭ باس ديرەكتورلارى مەن سالا ساراپشىلارى قاتىستى.
جەڭىمپاز رەتىندە سانجار تايجان LG كورپوراتسياسىنىڭ باس ديرەكتورى قاتىسقان ارنايى تۇسكى اسقا شاقىرىلدى.
"مەنىڭ باتارەيا ستارتابىم لوندوندا وتكەن الەمدەگى ەڭ ءىرى اۆتوونەركاسىپ “MOVE” اتالاتىن كونفەرەنتسياسىندا 200 ستارتاپتىڭ ىشىنەن «2025 جىلدىڭ ستارتاپى» دەپ اتاندى! بۇل ءىس-شاراعا 5 000 قاتىسۋشى قاتىستى — اراسىندا Mercedes-Benz, BMW, Hyundai باسشىلارى بار. PS. LG باس ديرەكتورىمەن بىرگە جەڭىس تۇسكى اسىنا ريزامىن", - دەپ جازدى ول جەلىدەگى پاراقشاسىندا.
