شىعىس قازاقستان وبلىسى كاتونقاراعاي اۋدانىندا ورەل وزەنى ارناسىنان اسىپ، ۇيلەرگە سۋ كىردى. بۇل تۋرالى وبلىس اكىمدىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«اۋا تەمپەراتۋراسىنىڭ كۇرت تومەندەۋىنە بايلانىستى وزەن ارناسىنا مۇز قاتىپ، سونىڭ سالدارىنان سۋدىڭ دەڭگەيى كوتەرىلگەن. سۋ 3 ۇيگە كىرىپ، 9 ءۇيدىڭ اۋلاسىنا جايىلدى»،—دەلىنگەن حابارلامادا.
اۋدان اكىمى ءدىلدار قالتقاننىڭ ايتۋىنشا، قازىرگى تاڭدا توتەنشە جاعداي سالدارىن جويۋ جۇمىستارى جۇرگىزىلىپ جاتىر.
«ارنايى تەحنيكالار جۇمىلدىرىلدى. موتوپومپالارمەن سۋدى سىرتقا شىعاردى. قۇم سالىنعان قاپتاردان بوگەتتەر قويىلدى. وزەن ارناسىن قار-مۇزدان تازارتۋ جۇمىسى جالعاسۋدا. اۋىل تۇرعىندارىنىڭ قاۋىپسىزدىگى ءۇشىن بارلىق ءتيىستى جۇمىستار قولعا الىنعان»،—دەدى ول.
