قىرعىزستان پرەزيدەنتى سادىر جاپاروۆ حالىق قۇرىلتايىنىڭ دەلەگاتتارىن تۋدى وزگەرتۋ باستاماسىن قولداۋعا شاقىردى، دەپ حابارلايدى "ادىرنا" ۇلتتىق پورتالى.
بىشكەكتە مەملەكەت باسشىسىنىڭ قاتىسۋىمەن وتكەن ەكى كۇنگە سوزىلعان ەكىنشى حالىق قۇرىلتايى اياقتالدى. جۇمىستى قورىتىندىلاعان پرەزيدەنت مەملەكەتتىك تۋدى وزگەرتۋ باستاماسى وزىنە تيەسىلى ەكەنىن ايتتى.
دەگەنمەن مەملەكەتتىك ءرامىزدى وزگەرتۋ ماسەلەنى قاراۋ ونىڭ قۇزىرەتىنە كىرمەيتىندىكتەن، ول جوگوركۋ كەنەش سپيكەرى نۇرلانبەك شاكيەۆكە جۇگىنىپ، تۋ اۆتورلارىمەن تالقىلاۋ جۇرگىزۋدى سۇراعان.
سادىر جاپاروۆتىڭ سوزىنشە، شەتەلدىكتەر قىرعىزستان تۋىندا بەينەلەنگەن شاڭىراق پەن كۇن ساۋلەلەرىن كۇنباعىسپەن سالىستىرىپ، دۇرىس تۇسىنبەۋى سەبەپ بولعان.
جۇمىس ساپارى اياسىندا مەن 30-عا جۋىق ەلگە باردىم. شەتەلدىك دەلەگاتتارمەن كەزدەسۋلەردە مەنەن تۋ تۋرالى بەس رەت سۇرالعان شىعار. "ولار ءسىزدىڭ رەسپۋبليكاڭىزدىڭ باسىمدىعى نەدە دەيدى؟ ءسىز اگرارلىق رەسپۋبليكاسىز با؟" دەپ ءجيى سۇرايدى. تۋدى وزگەرتۋگە ۇلكەن قارجىلىق شىعىندار تالاپ ەتىلمەيدى. تولقۇجاتتار مەن كولىك نومىرلەرىن وزگەرتۋدىڭ قاجەتى جوق، ولاردىڭ جارامدىلىق مەرزىمى بىتكەن سايىن بىرتىندەپ اۋىستىرىلادى. ەڭ الدىمەن ەلشىلىكتەر مەن ديپلوماتيالىق وكىلدىكتەردە، كەيىن مينيسترلىكتەر مەن ۆەدومستۆولاردا تۋلار اۋىستىرىلادى. بۇل كوپ اقشانى قاجەت ەتپەيدى. پارلامەنت سپيكەرىنىڭ ايتۋىنشا، بۇل شىعىنداردى دەمەۋشىلەر وتەي الادى. باستاپقى شىعىندارعا جەكە قاراجات بولۋگە دايىنمىن. بۇگىن وسى باستامانى، اسىرەسە جاستاردىڭ قولداۋ كورسەتۋلەرىن سۇرايمىن. ءبىز تولىق وزگەرتۋدى ۇسىنبايمىز، تەك تۋىمىزدى جاقسارتقىمىز كەلەدى، - دەدى سادىر جاپاروۆ.
ايتا كەتەيىك، 29 قاراشادا پارلامەنت زاڭ جوباسىن ءبىرىنشى وقىلىمدا ماقۇلداعان بولاتىن. 66 دەپۋتات قولدايتىنىن ايتىپ، وڭ داۋىس بەرسە، ال 8 -ءى قارسى.
بۇل وزگەرىسكە قاتىستى ەلدىڭ ۇقك توراعاسى قامشىبەك تاشيەۆ تە ءوز پىكىرىن ايتقان:
"تۋ كۇنباعىسقا ۇقساماۋى كەرەك، بىراق جارقىراعان كۇننىڭ بەينەسىن بەرۋى كەرەك", - دەدى.
قىرعىزستاندا تۋدى وزگەرتۋ تۋرالى پىكىرتالاستار ءالى كۇنگە دەيىن جالعاسىپ جاتىر. الەۋمەتتىك جەلىلەردە #تۋوزگەرمەسىن حەشتەگىمەن ءتۇرلى جازبالار، فلەشموب ۇيىممداستىرىلۋدا.
