قازاقستاننىڭ ۇلتتىق ەكونوميكا مينيسترلىگى رەسەي ارمياسىن قامتاماسىز ەتەدى دەگەن كۇدىككە ىلىنگەن Elem Group كومپانياسىنا قاتىستى مالىمدەمە جاسادى، دەپ حابارلايدى «ادىرنا» ۇلتتىق پورتالى.
«7 جەلتوقساندا «Elem group» جشس اقش ساۋدا مينيسترلىگىنىڭ ونەركاسىپ جانە قاۋىپسىزدىك بيۋروسىنىڭ سۋبەكتىلەر تىزىمىنە ەنگىزىلدى. ايتا كەتەيىك، 2023 جىلدىڭ مامىر ايىنان بەرى «Elem group» جشس سىرتقى ساۋدا قىزمەتىن جۇرگىزبەگەن.
«ەنگىزىلگەن شەكتەۋلەر بويىنشا، بۇدان بىلاي اقش جەتكىزۋشىلەرى امەريكالىق تاۋارلاردى وسى تىزىمگە ەنگىزىلگەن كومپانيالارعا ارنايى ليتسەنزياسىز جىبەرە المايتىنىن بىلدىرەدى»، - دەپ حابارلادى دۇيسەنبىدە قازاقستاننىڭ ۇلتتىق ەكونوميكا مينيسترلىگى.
اقپاراتقا سايكەس، «اقش ساۋدا مينيسترلىگى شەكتەۋلەرىنە ۇشىراعان كومپانيالار امەريكالىق كونتراگەنتتەرمەن جۇمىس ىستەۋدى قوسپاعاندا، جۇمىسىن جالعاستىرا الادى». «بۇل تىزىمگە سونىمەن قاتار گەرمانيا، جاپونيا، بەلگيا، ۇلىبريتانيا جانە ت.ب. دامىعان ەلدەردىڭ كاسىپورىندارى كىرەدى. بۇل قايتالاما سانكتسيالار ەمەس، ياعني اقش قارجى مينيسترلىگىنىڭ (SDN list) شەتەلدىك اكتيۆتەردى باقىلاۋ باسقارماسىنىڭ (OFAC) بۇعاتتاۋ تىزىمىنە جاتپايتىنىن ەسكەرۋ ماڭىزدى»، - دەلىنگەن حابارلامادا.
ەسكە سالايىق، 17 جەلتوقساندا قازاقستاندىق Elem group كومپانياسى ۋكرايناداعى رەسەيلىك ارميانى قامتاماسىز ەتەدى دەگەن كۇدىككە ىلىنگەنىن حابارلاعان بولاتىنبىز.
«ادىرنا» ۇلتتىق پورتالى
