Orda life YouTube-ارناسىندا التىن وردا بازارىنا بايلانىستى داۋلى ۆيدەو جاريالاندى. «التىن وردا» ساۋدا كەشەنىن جالعا الۋشى دانيار الپيەۆتىڭ «Altyn Orda New Company» كومپانياسى جاڭا ساۋدا كەشەنىن سالىپ بەرەمىن دەپ ۋادە بەرىپ، 300-دەن استام ۇلەسكەردەن 1,5 ملرد تگ كولەمىندە قارجى جيناعان. «كەلىسىم» بويىنشا، ساۋدا ورىندارىنا بولەك اقشا، حالىق كوپ جۇرەتىن ءوتىمدى بۋتيكتەرگە بولەك «شاپكا» العان. ەندى دانيار الپيەۆ باستاعان سىبايلاستار توبى ءىزىم-قايىم جوعالعان.
بىرنەشە ايعا سوزىلعان قۇرىلىس جوباسىنىڭ اياقتالۋىن تالاپ ەتكەن ساۋداگەرلەر دانيار الپيەۆتىڭ ءالى كۇنگە دەيىن جاۋاپكەرشىلىككە تارتىلماعانىنا نارازى ەكەنىن بىلدىرۋدە.
اتالعان قۇرىلىستى دانيار الپيەۆتىڭ مەنشىگىندەگى «الدان ستروي» جشس سالۋى كەرەك بولعان، الايدا بەكىتىلگەن مەرزىمدە ەشتەڭە دە سالماعان. ەندى ونىڭ قانداي ۇيدە تۇراتىندىعى انىقتالدى. «Orda life» جۇرگىزگەن جۋرناليستىك زەرتتەۋدە الپيەۆتىڭ وزىنە، اناسىنا جانە قارىن بولەسى ەرمەك مارقاباەۆتىڭ اتىنا رەسمي تىركەلگەن 6 كوتتەدج بەن 4 اۆتوكولىك قانا اتالعان. بۇدان بولەك ونىڭ وزگە جاقىن تۋىستارى مەن سەنىمدى وكىلدەرىنىڭ اتىنا تىركەلگەن جىلجىمايتىن مۇلىك كوپ كورىنەدى.
جۋرناليستىك زەرتتەۋدە «دانيار الپيەۆ وسى ۇيدە تۇرا ما؟» دەگەن ساۋالعا جاۋاپ بەرۋدەن قاشقان كەلىنشەك ءاۋ باستا الپيەۆتىڭ ۇيدە جوق ەكەنىن، كەيىن بۇل ۇيدە تۇرمايتىنىن ايتىپ، ەسىكتى جاۋىپ الدى. ەكىنشى تاراپ تاۋىس قۇساپ باسىن قۇمعا تىعىپ العانى كورىنەدى.
ايتا كەتەيىك، «التىن وردا» ساۋدا كەشەنىنىڭ باسشىلىعى اياقتالماي قالعان قۇرىلىستى «پرايم ستروي ءححى» جشس-نە اياقتاۋدى تاپسىرعان. جاڭا مەردىگەرلىك كومپانيا وكىلى تالعات بازارباەۆتىڭ ايتۋىنشا، قۇرىلىس ىرگەتاسىنا 36 ميليمەترلىك ارماتۋرا پايدالانىلادى، الايدا دانيار الپيەۆتىڭ كومپانياسى ونىڭ ورنىنا 22 ميليمەترلىك ارماتۋرا سالىپ جىبەرگەن.
حالىقتان ءبىر جەگەن، قۇرىلىستان ەكى جەگەن الپيەۆتىڭ وزىنەن ەشقانداي حابار جوق. ەكى جەپ بيگە شىققان ەشكىم جوق، كرەديتكە كىرگەن حالىقتىڭ نالاسى الىسقا جىبەرمەيتىنى انىق.
ەستەرىڭىزگە سالا كەتەيىك، اعىمداعى جىلدىڭ جاز ايىندا «كومپانيا نومەر ودين» جشس بازاردى جالعا الۋشى دانيار الپيەۆپەن كەلىسىم-شارت بۇزعان بولاتىن.
«ادىرنا» ۇلتتىق پورتالى
