Orda life YouTube-arnasynda Altyn Orda bazaryna baılanysty daýly vıdeo jarııalandy. «Altyn Orda» saýda keshenin jalǵa alýshy Danııar Álpıevtiń «Altyn Orda New Company» kompanııasy jańa saýda keshenin salyp beremin dep ýáde berip, 300-den astam úleskerden 1,5 mlrd tg kóleminde qarjy jınaǵan. «Kelisim» boıynsha, saýda oryndaryna bólek aqsha, halyq kóp júretin ótimdi býtıkterge bólek «shapka» alǵan. Endi Danııar Álpıev bastaǵan sybaılastar toby izim-qaıym joǵalǵan.
Birneshe aıǵa sozylǵan qurylys jobasynyń aıaqtalýyn talap etken saýdagerler Danııar Álpıevtiń áli kúnge deıin jaýapkershilikke tartylmaǵanyna narazy ekenin bildirýde.
Atalǵan qurylysty Danııar Álpıevtiń menshigindegi «Aldan stroı» JShS salýy kerek bolǵan, alaıda bekitilgen merzimde eshteńe de salmaǵan. Endi onyń qandaı úıde turatyndyǵy anyqtaldy. «Orda life» júrgizgen jýrnalıstik zertteýde Álpıevtiń ózine, anasyna jáne qaryn bólesi Ermek Marqabaevtyń atyna resmı tirkelgen 6 kottedj ben 4 avtokólik qana atalǵan. Budan bólek onyń ózge jaqyn týystary men senimdi ókilderiniń atyna tirkelgen jyljymaıtyn múlik kóp kórinedi.
Jýrnalıstik zertteýde «Danııar Álpıev osy úıde tura ma?» degen saýalǵa jaýap berýden qashqan kelinshek áý basta Álpıevtiń úıde joq ekenin, keıin bul úıde turmaıtynyn aıtyp, esikti jaýyp aldy. Ekinshi tarap taýys qusap basyn qumǵa tyǵyp alǵany kórinedi.
Aıta keteıik, «Altyn Orda» saýda kesheniniń basshylyǵy aıaqtalmaı qalǵan qurylysty «Praım Stroı HHI» JShS-ne aıaqtaýdy tapsyrǵan. Jańa merdigerlik kompanııa ókili Talǵat Bazarbaevtyń aıtýynsha, qurylys irgetasyna 36 mılımetrlik armatýra paıdalanylady, alaıda Danııar Álpıevtiń kompanııasy onyń ornyna 22 mılımetrlik armatýra salyp jibergen.
Halyqtan bir jegen, qurylystan eki jegen Álpıevtiń ózinen eshqandaı habar joq. Eki jep bıge shyqqan eshkim joq, kredıtke kirgen halyqtyń nalasy alysqa jibermeıtini anyq.
Esterińizge sala keteıik, aǵymdaǵy jyldyń jaz aıynda «Kompanııa nomer odın» JShS bazardy jalǵa alýshy Danııar Álpıevpen kelisim-shart buzǵan bolatyn.
«Adyrna» ulttyq portaly
