رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا جازۋشى، «ادىلەتتى رەسەي – شىندىق ءۇشىن» پارتياسىنىڭ تەڭ توراعاسى زاحار پريلەپيننىڭ مالىمدەمەسىنە بايلانىستى پىكىر ءبىلدىردى، دەپ حابارلايدى «ادىرنا» ءتىلشىسى.
«رەسەي مەن وزبەكستاندى جان-جاقتى ستراتەگيالىق سەرىكتەستىك پەن وداقتاستىق قاتىناستار بايلانىستىرادى. بۇل جاي عانا جاقسى ءسوز ەمەس. ءوزارا بايلانىستىڭ وركەندەپ كەلە جاتقانىن وزبەكستان پرەزيدەنتى شاۆكات ميرزيوەۆتىڭ قازان ايىندا ەلىمىزگە جاساعان رەسمي ساپارى كەزىندە العان اسەرلى ناتيجەلەرى مەن كەڭەس وتىرىسىندا ورناعان ەكى ەل باسشىسىنىڭ اراسىنداعى جىلى اتموسفەرا دالەلدەيدى.
ءبىز 2004 جىلعى 16 ماۋسىمداعى ستراتەگيالىق سەرىكتەستىك جانە 2005 جىلعى 14 قاراشاداعى وداقتاستىق قاتىناستار تۋرالى كەلىسىمدەرگە تولىقتاي بەيىلدىمىز. ءوزارا مىندەتتەمەلەرگە سايكەس، ءبىزدىڭ ىنتىماقتاستىعىمىز ەگەمەندىكتى قۇرمەتتەۋ مەن دوستىق نەگىزىندە قۇرىلادى»،—دەدى ول.
ايتۋىنشا، رەسەي مەن ورتالىق ازيانى ورتاق تاريح، تىعىز ادامي جانە مادەني بايلانىستار، ساۋدا-ەكونوميكالىق جانە تىكەلەي ەكونوميكالىق بايلانىستار بىرىكتىرەدى.
«ءبىز ءبىر-بىرىمىزگە كومەكتەسۋگە ارقاشان دايىنبىز. بۇل بىرنەشە رەت ىسپەن راستالعان. ماسەلەن، كوروناۆيرۋستىق پاندەميا كەزىندەگى ءوزارا قولداۋ، زارداپ شەككەن ايماقتاردىڭ تۇرعىندارىنا گۋمانيتارلىق كومەك، ورتالىق ازياداعى قالىپتان تىس سۋىق كەزدە رەسەيلىك ەنەرگەتيكالىق رەسۋرستاردى جەتكىزۋ.
كوشى-قون تاقىرىبىنا قاتىستى رەسەيلىك تاراپ شەتەلدەن، ءبىرىنشى كەزەكتە دوس ەلدەردەن ەڭبەك رەسۋرستارىن تارتۋ ءبىزدىڭ مەملەكەتتىڭ دە، مۇنداي قىزمەتتەردى ەكسپورتتايتىن ەلدەردىڭ دە مۇددەلەرىنە سايكەس كەلەتىنىن بىرنەشە رەت اتاپ ءوتتى. قازىرگى ۋاقىتتا كوشى-قون ءوزارا ءتيىمدى ەتۋ ماقساتىندا نورماتيۆتىك-قۇقىقتىق، ۇيىمداستىرۋشىلىق، اقپاراتتىق جانە باسقا دا شارالاردىڭ تۇتاس كەشەنى بويىنشا جۇمىس جۇرگىزىلۋدە. پريلەپيننىڭ مالىمدەمەلەرى ونىڭ جەكە پىكىرى ەكەنى انىق، بۇل ءتىپتى رەسەي فەدەراتسياسىنىڭ رەسمي ۇستانىمىن الىستان كورسەتپەيدى»،—دەپ تولىقتىردى ماريا زاحاروۆا.
