ەڭبەك جانە حالىقتى الەۋمەتتىك قورعاۋ مينيسترلىگى 2024 جىلى قازاقستاندا زەينەتاقى مەن جاردەماقى قالاي وسەتىنىن ايتتى، دەپ حابارلايدى “ادىرنا” ۇلتتىق پورتالى.
2024-2026 جىلدارعا ارنالعان رەسپۋبليكالىق بيۋدجەت تۋرالى زاڭدا 2024 جىلعى 1 قاڭتاردان باستاپ مەملەكەتتىك جاردەماقىلار مەن بازالىق زەينەتاقى تولەمدەرىنىڭ بارلىق تۇرلەرىن ۇلتتىق بانك ايقىندايتىن ينفلياتسيانىڭ بولجامدى دەڭگەيىنە سايكەس 7 پايىزعا، ىنتىماقتى زەينەتاقىنى - 9 پايىزعا، ياعني ينفلياتسيا دەڭگەيىنەن ەكى پايىزعا جوعارى كوتەرۋ كوزدەلگەنى حابارلاندى.
"بيۋدجەتتەن جيىنتىق زەينەتاقىنىڭ ورتاشا مولشەرى (بجزق-دان تولەمدەردى ەسەپتەمەگەندە) 2024 جىلى 130 414 تەڭگە (2023 جىلى - 120 838 تەڭگە) بولادى", - دەلىنگەن حابارلامادا.
سونىمەن قاتار، مەملەكەت باسشىسىنىڭ تاپسىرماسى بويىنشا 2023 جىلدان باستاپ بەس جىلدىق كەزەڭ ىشىندە ەڭ تومەنگى بازالىق زەينەتاقىنى جىل سايىنعى كەزەڭ-كەزەڭمەن ەڭ تومەنگى كۇنكورىس دەڭگەيىنىڭ 70 پايىزىنا، ەڭ كوبى 120 پايىزعا دەيىن ارتتىرۋ جۇزەگە اسىرىلىپ جاتىر.
ماسەلەن، 2024 جىلعى 1 قاڭتاردان باستاپ بازالىق زەينەتاقىنىڭ ەڭ تومەنگى مولشەرى ەڭ تومەنگى كۇنكورىس دەڭگەيىنەن 60-تان 65 پايىزعا دەيىن ارتادى، بۇل - 28 215 تەڭگە، ەڭ جوعارى مولشەرى - ەڭ تومەنگى كۇنكورىس دەڭگەيىنەن 100-دەن 105 پايىزعا دەيىن، بۇل 45 578 تەڭگە بولادى.
2024 جىلعى 1 قاڭتاردان باستاپ مەملەكەتتىك جاردەماقىلاردى ارتتىرۋدىڭ كەيبىر مىسالدارى:
- 1-ءشى، 2-ءشى، 3-ءشى بالا تۋعاندا تولەنەتىن جاردەماقى 131 100 تەڭگەدەن 140 296 تەڭگەگە دەيىن، 4 جانە ودان دا كوپ بالا تۋعاندا 217 350 تەڭگەدەن 232 596 تەڭگەگە دەيىن وسەدى;
- بالا سانىنا بايلانىستى كوپبالالى وتباسىلارعا بەرىلەتىن جاردەماقى مولشەرى 4 بالالى وتباسىلارعا 55 304 تەڭگەدەن 59 183 تەڭگەگە دەيىن، 10 بالالى وتباسىلارعا 138 000 تەڭگەدەن 147 680 تەڭگەگە دەيىن وسەدى;
- I توپتاعى مۇگەدەكتەرگە بەرىلەتىن جاردەماقى 89 248 تەڭگەدەن 95 496 تەڭگەگە، II توپتاعى مۇگەدەكتەرگە – 71 398 تەڭگەدەن 76 397 تەڭگەگە، III توپتاعى مۇگەدەكتەرگە بەرىلەتىن جاردەماقى 48 681 تەڭگەدەن 52 089 تەڭگەگە دەيىن وسەدى.
ۇقساس جاڭالىقتار
