پاناماداعى دۇنيەجۇزىلىك روبوتوتەحنيكا وليمپياداسىنداعى جەتىستىكتەرىنەن شابىتتانعان استانالىق «Robotek» مەكتەبىنىڭ وقۋشىلارى جاڭا تانىمال جوبا – اۆتونومدى كولىكتىڭ ۇلگىسىن جاسادى.
پاناما قالاسىنان ورالعان سوڭ «الەمدى بايلانىستىرامىز» ستراتەگياسى مەن WRO-2023 جاھاندىق جەتىستىكتەرىنەن شابىتتانعان «روبوتەك» وقۋشىلارى جاڭا جوبامەن جۇمىس ىستەي باستادى. بۇل شىنايى ۋاقىتتا وڭتايلى قوزعالىس تراەكتورياسىن وزدىگىنەن قۇراستىراتىن ماشينانىڭ وقۋ ۇلگىسى. روبوت قازىر «Altel» ۇيالى بايلانىس وپەراتورى جۇزەگە اسىرىپ جاتقان 5G – دەرەكتەردى بەرۋدىڭ جوعارى جىلدامدىقتى تەحنولوگيالارىنا سايكەس جاسالعان.
جاڭا جىل قارساڭىندا قۇرامىندا باتىرحان بايتەرەكوۆ، مارات كازكەنوۆ، ۆاگيز ديسەمباەۆ، جانارىس كاپاروۆ، اڭسار ساۋىرباەۆ بار ەلىمىزگە جانە الەمگە تانىمال، تابىستى ۇجىم جۇمىسىن قورىتىندىلادى.
– ءبىزدىڭ كولىك جولدىڭ ناقتى جاعدايىنا جاقىن، ارنايى سىناق الاڭىنداعى جارىستارعا ارنالعان. روبوت اۆتونومدى، كەسكىن 5G ارقىلى بەرىلەدى»، – دەپ اتاپ ءوتتى جوبانىڭ عىلىمي جەتەكشىسى ۆلاديمير ۋسولتسەۆ.
2023 جىلى دۇنيەجۇزىلىك روبوتوتەحنيكا وليمپياداسىنىڭ «الەمدى بايلانىستىرامىز» تاقىرىبى تسيفرلىق تەحنولوگيالاردىڭ ينفراقۇرىلىمى مەن لوگيستيكاسىنا ارنالعانىنىڭ سيمۆولدىق ءمانى بار.
– بۇگىنگى كۇنى «Robotek» بىرنەشە باعىتتا جۇمىس ىستەيدى، سونىڭ ىشىندە تاجىريبەلىك زەرتحانا رەتىندە، ناقتى ىسكە اسىرۋعا باعىتتالعان تانىمال جوبالار جاسالادى. Digital-باعىتتىڭ قارقىندى دامۋى مىندەتتى تۇردە تسيفرلىق تەحنولوگيالاردىڭ ينفراقۇرىلىمى مەن لوگيستيكاسىنىڭ ءتيىستى دەڭگەيىن، ينجەنەرلىك شەشىمدەردىڭ كرەاتيۆتىلىگى مەن تيىمدىلىگىن تالاپ ەتەدى. بۇل كەڭ-بايتاق اۋماعى بار ەلىمىزدە بۇل وتە وزەكتى، – دەپ اتاپ ءوتتى «Robotek» باس ديرەكتورى سانجار شالقاربەكوۆ.
«Connecting the World» تاقىرىبى 2024 جىلى حالىقارالىق دەڭگەيگە شىعۋدى جوسپارلاپ وتىرعان بەدەلدى Robotek Grand Tournament شاراسىندا باستى تاقىرىپتاردىڭ ءبىرى رەتىندە جوسپارلانعان. اقش، تۇركيا، ءازىربايجان، وزبەكستان، قىرعىزستان جانە باسقا دا ەلدەردىڭ جاس روبوتوتەحنيكتەرى استاناعا كەلۋگە دايىن ەكەندىكتەرىن راستادى.
