بۇگىن جۋرناليست، جۋرناليستەر اكادەمياسىنىڭ اكادەميگى، قر مادەنيەت جانە اقپارات مينيسترلىگىنىڭ «مادەنيەت قايراتكەرى» جۇمابەك كەنجاليننىڭ تۋعان كۇنى. ول 1954 جىلى 30 جەلتوقساندا قوستاناي وبلىسىنىڭ امانگەلدى اۋدانىنداعى «جاڭا تۇرمىس» كولحوزىندا تۋعان.
1981 جىلى قازاق مەملەكەتتىك ۋنيۆەرسيتەتىن تامامداعان سوڭ، «سوتسياليستىك قازاقستان» («ەگەمەن قازاقستان») گازەتىندە ءتىلشى، ءبولىم مەڭگەرۋشىسى، 1986— 1988 جىلدارى «ءبىلىم جانە ەڭبەك» («زەردە») جۋرنالىندا جاۋاپتى حاتشى، باس رەداكتوردىڭ مىندەتىن اتقارۋشى بولدى. 1997 — 1999 جىلدارى «قازاق ادەبيەتى» گازەتىنىڭ باس رەداكتورى قىزمەتىن اتقاردى.
شىعارمالارى رەسپۋبليكالىق مەرزىمدى باسىلىم بەتتەرىندە جاريالانىپ ءجۇر. «جەلكىلدەپ وسكەن قۇراقتاي»، (1988, «ونەر»), «شىندىقتى شىراق ەتىپ ۇستاڭىز» (1998, «قازاقستان»), «ۇلت رۋحىن ۇلىقتاعان ۇرپاقپىز» (2005, «ولكە») دەپ اتالاتىن دەرەكتى اڭگىمەلەر مەن ەسسەلەر كىتاپتارىنىڭ اۆتورى.
قازاقستان جۋرناليستەر وداعى سىيلىعىنىڭ لاۋرەاتى (1984), قازاقستان رەسپۋبليكاسى پرەزيدەنت سىيلىعىنىڭ لاۋرەاتى (2006), قر مادەنيەت جانە اقپارات مينيسترلىگىنىڭ «مادەنيەت قايراتكەرى» بەلگىسىمەن ماراپاتتالعان (2004). قازاقستان جۋرناليستەر اكادەمياسىنىڭ تولىق مۇشەسى — اكادەميگى (2001).
جۋرناليست 2017 جىلى، 24 ماۋسىمدا 63 جاسىنا قاراعان شاعىندا دۇنيەدەن وزدى.
«ادىرنا» ۇلتتىق پورتالى
