Búgin jýrnalıst, Jýrnalıster Akademııasynyń akademıgi, QR Mádenıet jáne aqparat mınıstrliginiń «Mádenıet qaıratkeri» Jumabek Kenjalınniń týǵan kúni. Ol 1954 jyly 30 jeltoqsanda Qostanaı oblysynyń Amangeldi aýdanyndaǵy «Jańa turmys» kolhozynda týǵan.
1981 jyly Qazaq Memlekettik ýnıversıtetin tamamdaǵan soń, «Soıalıstik Qazaqstan» («Egemen Qazaqstan») gazetinde tilshi, bólim meńgerýshisi, 1986— 1988 jyldary «Bilim jáne eńbek» («Zerde») jýrnalynda jaýapty hatshy, bas redaktordyń mindetin atqarýshy boldy. 1997 — 1999 jyldary «Qazaq ádebıeti» gazetiniń bas redaktory qyzmetin atqardy.
Shyǵarmalary respýblıkalyq merzimdi basylym betterinde jarııalanyp júr. «Jelkildep ósken quraqtaı», (1988, «Óner»), «Shyndyqty shyraq etip ustańyz» (1998, «Qazaqstan»), «Ult rýhyn ulyqtaǵan urpaqpyz» (2005, «Ólke») dep atalatyn derekti áńgimeler men esseler kitaptarynyń avtory.
Qazaqstan jýrnalıster odaǵy syılyǵynyń laýreaty (1984), Qazaqstan Respýblıkasy Prezıdent syılyǵynyń laýreaty (2006), QR Mádenıet jáne aqparat mınıstrliginiń «Mádenıet qaıratkeri» belgisimen marapattalǵan (2004). Qazaqstan Jýrnalıster Akademııasynyń tolyq múshesi — akademıgi (2001).
Jýrnalıst 2017 jyly, 24 maýsymda 63 jasyna qaraǵan shaǵynda dúnıeden ozdy.
«Adyrna» ulttyq portaly
