پرەزيدەنت قاسىم-جومارت توقاەۆ ءماجىلىس توراعاسى ەرلان قوشانوۆتى قابىلدادى، دەپ حابارلايدى «ادىرنا» ءتىلشىسى اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسىنا ءماجىلىستىڭ زاڭ شىعارۋ قىزمەتى تۋرالى باياندالدى.
«سەسسيا باستالعالى بەرى 35 زاڭ قابىلدانىپ, سەناتقا جولداندى. «ۇلتتىق قور – بالالارعا» باعدارلاماسىنىڭ جۇزەگە اسىرىلۋىن، سونداي-اق جەر قويناۋىن پايدالانۋ، بيزنەس جۇرگىزۋ، تالىمگەرلىك پەن بالالاردىڭ قاۋىپسىزدىگى، دەنساۋلىققا زيان كەلتىرەتىن جۇمىس ورىندارىندا ەڭبەك ەتەتىن ازاماتتاردى ارنايى تولەماقىمەن قامتاماسىز ەتۋ ماسەلەلەرىن رەتتەيتىن قۇجاتتار قابىلداندى»،—دەدى ەرلان قوشانوۆ.
ايتۋىنشا، قازىرگى ۋاقىتتا دەپۋتاتتاردىڭ قاراۋىندا 69 زاڭ جوباسى جاتىر جانە ونىڭ ۇشتەن ءبىر بولىگىنە ءماجىلىس دەپۋتاتتارى وزدەرى باستاماشى بولعان.
بۇدان بولەك توراعا بيۋدجەت كودەكسى، حالىقتىڭ تىم كوپ نەسيە الۋىن تومەندەتۋ، تۇرعىن ءۇي ساياساتى، مەملەكەتتىك ساتىپ الۋ، عىلىم جانە تەحنولوگيالىق ساياسات، تۇتىنۋشىلاردىڭ قۇقىقتارىن قورعاۋ، جىلۋ ەنەرگەتيكاسى، ماسس-مەديا، ادام ساۋداسىنا قارسى ءىس-قيمىل جانە باسقا دا زاڭ جوبالارى بويىنشا جۇمىستار جۇرگىزىلىپ جاتقانىن جەتكىزدى;
مەملەكەت باسشىسى ءماجىلىستىڭ 2023 جىلى اتقارعان جۇمىستارىنا وڭ باعا بەردى. پرەزيدەنتتىڭ ايتۋىنشا، قابىلدانعان زاڭدار حالىقتىڭ تۇرمىس ساپاسىن ارتتىرۋعا تىكەلەي ىقپال ەتەدى.
قاسىم-جومارت توقاەۆ ەلىمىزدىڭ الەۋمەتتىك-ەكونوميكالىق جاڭعىرۋ باعدارىنا قاتىستى نەگىزگى شارالاردى جۇزەگە اسىرۋدى كوزدەيتىن زاڭداردى قابىلداۋ قاجەت ەكەنىنە نازار اۋداردى.
