شقو تارباعاتاي اۋدانىندا "رۋحاني جاڭعىرۋ" باعدارلاماسى اياسىندا «تۇعىرى بيىك تارباعاتاي» حالىقارالىق سپورت پەن ونەر فەستيۆالى ءوتتى.
شارا بارىسىندا اقسۋات اۋىلىندا «QAZAQ promotions» قازاق بوكسشىلارىنىڭ كاسىپقوي بوكستا جەتىستىككە جەتۋىن قولداپ جۇرگەن پروموۋتەرلىك كومپانياسىنىڭ ۇيىمداستىرۋىمەن ۋكراينا، بەلورۋسسيا، ارمەنيا مەن قازاقستاننىڭ كاسىپقوي بوكسشىلارى ايقىن شايقاستا باقتارىن سىناپ، مىقتىلارى انىقتالدى. – تارباعاتاي تورىندە وسىنداي كولەمدە تۋرنير وتكىزۋدەگى ماقساتىمىز – اۋىل جاستارىنا بۇقارالىق سپورتتى ناسيحاتتاۋ، سالاۋاتتى ءومىر سالتىنا جاستاردى قىزىقتىرۋ جانە قازاقستاندىق بوكس ونەرىن دامىتۋ. تانىلماي جاتقان تالانتتى جاستارعا مۇمكىندىك بەرۋىمىز قاجەت. جەرگىلىكتى ازاماتتاردىڭ قولداۋىمەن ءوتىپ جاتقان ۇلكەن دودا – تۋعان جەرگە دەگەن سۇيىسپەنشىلىك پەن ريزاشىلىقتىڭ كورىنىسى دەپ بىلەمىن. قازاقستاننىڭ ءاربىر ازاماتى شاماسى كەلگەنشە تۋعان جەرىن كوركەيتىپ، دامۋىنا ءوز سەپتىگىن، ۇلەسىن قوسىپ جاتسا، كوشىمىز ودان سايىن ىلگەرى باسارى انىق. تۋعان جەردىڭ تۋىن بيىك ۇستاۋىمىز كەرەك،-دەدى قازاقستاندىق كاسىپقوي بوكسشى، ۇيىمداستىرۋشىلار القاسىنىڭ توراعاسى قانات يسلام.
ءداستۇرلى تۇردە وتكىزىلەتىن ءدۇبىرلى دودا جاستاردى رۋحتاندىرىپ، جاڭا چەمپيوندار ەسىمىن انىقتايتىن بولادى. جارىستىڭ حالىقارالىق دەڭگەيگە كوتەرىلۋىنىڭ ءوزى جاقسى كورسەتكىش. ايتا كەتسەك، بوكسشىلار 60 كەلىدەن باستاپ، 100 كەلىگە دەيىنگى سالماق دارەجەسى ارالىعىندا باقتارىن سىنادى.
"ادىرنا" ۇلتتىق پورتالى
