بۇگىن شقو اكىمىنىڭ ورىنباسارى اسەم ءنۇسىپوۆا وبلىستا ۇلتتىق بىرىڭعاي تەستىلەۋ وتكىزۋ بارىسى مەن دايىندىق جۇمىستارى، مەكتەپ تۇلەكتەرىنىڭ الەۋەتى بويىنشا ءباسپاسوز ءماسليحاتىن وتكىزدى.
- بيىل وبلىس مەكتەپتەرىن ءتامامدايتىن 8490 تۇلەكتىڭ 6669-ى ۇبت تاپسىرۋعا ءوتىنىش ءبىلدىردى. شىعىس قازاقستان وبلىسىندا 2017 جىلدان باستاپ ايماق باسشىسى د. احمەتوۆتىڭ تاپسىرماسى بويىنشا «بىلىكتى مامان» جوباسى تابىستى جۇزەگە اسىرىلۋدا. جوبانىڭ نەگىزگى ماقساتى - مەكتەپ، كوللەدج تۇلەكتەرىنىڭ شەتەلدىك جوعارى وقۋ ورىندارىنا كەتۋىن ازايتۋ جانە جوعارى ءبىلىمنىڭ قولجەتىمدىلىگىن ارتتىرۋ بولىپ تابىلادى. اعىمداعى جىلى وبلىس اكىمدىگى وڭىردەگى سۇرانىسقا يە ماماندىقتارعا بارلىعى 400 بيۋدجەتتىك ورىن بولەدى. وبلىس اكىمدىگى تاراپىنان جىل سايىن جوعارى وقۋ ورىندارىنىڭ ستۋدەنتتەرىن وقىتۋعا ۇلكەن قاراجات ءبولۋ قاراستىرىلعان. ءبىر ستۋدەنتكە ورتا ەسەپپەن 1 جىلعا 800 مىڭ تەڭگە، ال وقۋدىڭ بارلىق تسيكلىنە 4,0 ملن.تەڭگە جۇمسالادى. جالپى 2017 جىلدان باستاپ اعىمداعى جىلى بولىنگەن گرانتتاردى ەسكەرە وتىرىپ، وقۋدىڭ تولىق تسيكلىنە قارجىلاندىرۋ 4,2 ملرد.تەڭگەنى قۇرايدى (1046 ستۋدەنتكە). بولىنگەن قاراجات وقىتۋشىنىڭ ەڭبەكاقىسىن تولەۋ قورىن، شاكىرتاقى مەن ستۋدەنتتىڭ جولاقىسىن قامتيدى، - دەدى اسەم ءنۇسىپوۆا.
ايتا كەتسەك، سوڭعى جىلدارى مەكتەپ تۇلەكتەرىنىڭ وزگە ەلدەرگە وقۋعا كەتۋى ايتارلىقتاي تومەندەدى. ەگەر 2016 جىلى وبلىس مەكتەپتەرىنىڭ 1800 تۇلەگى وقۋعا تىس جەرلەرگە كەتسە، 2017 جىلى - 890, 2018 جىلى 636 تۇلەك شەتەلدىك جوعارى وقۋ ورىندارىنا كەتتى (بۇل كورسەتكىش 2016 جىلمەن سالىستىرعاندا 35,3% - عا قىسقاردى). 2019 جىلعا بولجامعا سايكەس قر-نان تىس جەرلەرگە شىعاتىن تۇلەكتەر سانى جوسپارمەن 585 ادامدى قۇرايدى. سونىمەن قاتار بالالار ءۇشىن جوعارى ءبىلىمنىڭ قولجەتىمدىلىگى ايتارلىقتاي ءوستى. ەگەر 2017 جىلى ۇبت تاپسىرعان وبلىس مەكتەپ تۇلەكتەرىنىڭ 48% - ى ءبىلىم گرانتتارىن السا، 2018 جىلى مەكتەپ تۇلەكتەرىنىڭ 56% - ى رەسپۋبليكالىق جانە جەرگىلىكتى گرانتتارعا يە بولدى. وڭىرلىك جوعارى وقۋ ورىندارى تۇلەكتەرىنىڭ جۇمىسقا ورنالاسۋ پايىزى ارتتى (2017 جىلى - 89,5%، 2018 جىلى – 90,1%), وعان جوعارى وقۋ ورىندارىنداعى ءبىلىم بەرۋ ساپاسىنىڭ ارتۋى سەبەپ بولدى.
"ادىرنا" ۇلتتىق پورتالى
