قازاقستاندىق سپورتشىلار ماجارستاندا وتكەن حالىقارالىق ءتۋرنيردى بەس التىن، ءتورت كۇمىسپەن اياقتادى، دەپ حابارلايدى "ادىرنا" ءتىلشىسى.
ماجارستاننىڭ دەبرەتسەن قالاسىندا بوكستان يشتۆان بوچكاي اتىنداعى حالىقارالىق ءتۋرنيرى ءوز مارەسىنە جەتتى.
ۇلتتىق وليمپيادا كوميتەتىنىڭ رەسمي سايتىندا ءتۋرنيردىڭ ناتيجەسى جاريالاندى.
كوميتەت اقپاراتىنشا، قازاقستان ۇلتتىق قۇراماسىنىڭ 9 سپورتشىسى فينالعا دەيىن جەتكەن. بىلعارى قولعاپ شەبەرلەرى بەس التىن، ءتورت كۇمىسكە يە بولدى.
التىن مەدال جەڭىپ العان اسحات ءجۇسىپوۆ، اسىلجان سەرىكباي، بeيبارىس جەكسەن، ەرتۋعان زەينۋللينوۆ جانە 80 كەلى سالماقتاعى ەراسىل جاقپەكوۆ. اسحات ءجۇسىپوۆ فينالدا ۋكراينا وكىلى اندرەي تيشكوۆەتسپەن بوكستاسىپ، قارسىلاسىنان باسىم ءتۇستى. اقتىق مارەدە باق سىناپ، چەمپيون اتانعان باسقا قازاقستاندىق بوكسشىلار ماجارستان وكىلدەرىمەن بەتپە-بەت كەلگەن. ال اسىلجان سەرىكباي رولاند ۆەرەشتى تىزە بۇكتىرسە، بەيبارىس جەكسەن كرۋزيتو كوۆاچتان باسىم ءتۇستى.
بوكسشى ەرتۋعان زەينۋللينوۆ ريچارد كوۆاچتى، ەراسىل جاقپەكوۆ پال كوۆاچتى جەڭىپ، التىن يەگەرى اتاندى.
ال ءتورت سپورتشى فينالدا قارسىلاسىنا ەسە جىبەرىپ، كۇمىستى قاناعات ەتكەن. ەكىنشى ورىن يەلەنگەن قازاقستاندىق بوكسشىلار قاتارىندا دانيال ءسابيت، كەنجە مۇراتۇلى، سابىرجان اققالىقوۆ جانە تەمىرلان مۇقاتاەۆ بار.
