مينيسترلىك مەكتەپتە ناماز وقىعان وقۋشىلارعا قاتىستى تەكسەرىس باستادى

مەكتەپ قابىرعاسىندا ناماز وقىعان وقۋشىلاردىڭ ۆيدەوسى تاراعان ەدى. وقۋ-اعارتۋ مينيسترلىگى وقيعاعا بايلانىستى تەكسەرىس باستادى، دەپ حابارلايدى "ادىرنا" پورتالى.

الەۋمەتتىك جەلىدە تاراپ جاتقان جازبادان ءبىر توپ بالانىڭ ساجدەگە جىعىلىپ جاتقانىن بايقاۋعا بولادى. ولاردىڭ ارت جاعىندا مەكتەپ پارتاسى كورىنەدى. سپورتتىق كيىم كيگەن بوزبالالار قاي مەكتەپتىڭ شاكىرتتەرى ەكەنى ازىرگە بەلگىسىز. وقيعانىڭ قاي وڭىردە بولعانى دا بەيمالىم. جالپى زاڭ بويىنشا وقۋ ورىندارىندا ءدىني قۇلشىلىق جاساۋعا تىيىم سالىنعان. ۆەدومستۆو وكىلدەرى ساباق بارىسىندا قۇلشىلىق جاساۋعا رۇقسات بەرگەن ءبىلىم وشاعىن انىقتاپ، شارا قولدانباق. بۇل تۋرالى 31-ارنانىڭ “ينفورمبيۋرو” جاڭالىقتارىندا ايتىلعان بولاتىن. بۇعان دەيىن اقتوبەلىك ورامالدى وقۋشىلاردىڭ اتا-انالارى بيلىكتەن ەلىمىزدە ونلاين وقىتۋدى رەسمي تۇردە زاڭداستىرۋدى تالاپ ەتتى. سوزدەرىنشە ەكى جىلدان بەرى رەسەيدە ءبىلىم الىپ جاتقان بالالارى قازاقستاننىڭ ەمەس رەسەيدىڭ تاريحى مەن مادەنيەتىن ۇيرەنىپ جاتىر. ولار ءبىلىم مينيسترلىگى حيدجاب كيگەن وقۋشىلارعا مەكتەپكە بارۋعا تىيىم سالعالى بالالارى ءمۇجبۇرلى تۇردە وقشاۋلانىپ قالعانىن ايتتى. ەندى اتا-انالار پرەزيدەنت قاسىم- جومارت توقاەۆ پەن ءبىلىم ءمينيسترى اسحات ايماعامبەتوۆكە پەتيتسيا جولدايتىنىن مالىمدەگەن.