تالىپتەر دوحاداعى اۋعانستان جونىندەگى كونفەرەنتسياعا قاتىسۋدان باس تارتتى

تاليبان 18-19 اقپاندا دوحادا ءوتىپ جاتقان بۇۇ-نىڭ اۋعانستان جونىندەگى كونفەرەنتسياسىنا قاتىسۋدان باس تارتتى، دەپ حابارلايدى "ادىرنا" ۇلتتىق پورتالى اۋعاندىق تاۋەلسىز Hasht e Subh Daily ينتەرنەت گازەتىنە سىلتەپ. تاليبان كاتار كەزدەسۋىنە قاتىسۋ ءۇشىن ەكى شارت قويدى:

• ولاردىڭ دەلەگاتسياسى فورۋمداعى جالعىز اۋعان وكىلى بولۋى كەرەك;
• بۇۇ باس حاتشىسى انتونيۋ گۋتەرريش قوزعالىسپەن تىكەلەي كەلىسسوزدەرگە كىرىسۋى كەرەك.

ۇيىمداستىرۋشىلار تاراپىنان كەلىسىم بولماعاندىقتان، تاليبان كونفەرەنتسياعا بويكوت جاريالاۋدى ۇيعاردى. سونىمەن قاتار، تالىپتەر بۇۇ-نىڭ اۋعانستان بويىنشا ارنايى وكىلىن تاعايىنداۋعا ءۇزىلدى-كەسىلدى قارسى، الايدا دوحاداعى كونفەرەنتسيانىڭ ەكىنشى كۇنى وسى راسىمگە ارنالعان بولاتىن. دوحاداعى كەزدەسۋ جابىق ەسىك جاعدايىندا ءوتىپ جاتىر. وعان 20-عا جۋىق ەلدىڭ، سونىڭ ىشىندە وزبەكستان، تاجىكستان، رەسەي، اقش، ەو ەلدەرى جانە ت.ب. اۋعانستان بويىنشا وكىلدەر قاتىسۋدا. كونفەرەنتسياعا قاتىسۋعا اۋعانستاننىڭ ازاماتتىق قوعام وكىلدەرى مەن ايەلدەرى دە شاقىرىلعان. ايتا كەتەيىك، تاليباننىڭ ءوتىنىشى بويىنشا رەسەي دەلەگاتسياسى بەلسەندىلەرمەن كەزدەسۋگە قاتىسپايدى. بۇۇ اياسىندا اۋعانستان بويىنشا وتكەن كەزدەسۋ 2023 جىلدىڭ 1 مامىرىندا وتكەن بولاتىن. وعان الەمنىڭ ءتۇرلى ەلدەرىنەن، سونىڭ ىشىندە قازاقستان، قىرعىزستان، رەسەي، تاجىكستان، تۇركىمەنستان جانە وزبەكستاننان وكىلدەر قاتىستى. وعان قوسا، وعان بۇۇ-نىڭ اۋعانستانداعى ميسسياسىنىڭ باسشىسى روزا وتۋنباەۆا مەن وسى ەلدەگى جاعدايدى تاۋەلسىز باعالاۋ بويىنشا جۋىردا عانا تاعايىندالعان ارنايى ۇيلەستىرۋشى، تۇركيانىڭ بۇۇ جانىنداعى بۇرىنعى تۇراقتى وكىلى فەريدۋن سينيرليوگلۋ قاتىستى. كەيىن اقپان ايىنداعى كەڭەستە قارالاتىن بايانداما مەن ۇسىنىستار دايىندادى.