قىتايلىق حاكەرلەر توبى قازاقستاننىڭ IT-ينفراقۇرىلىمىنىڭ ماڭىزدى نىساندارىن ەكى جىلعا جۋىق ۋاقىت بويى باقىلاپ كەلگەن. بۇل تۋرالى كيبەرشابۋىلداردى تالداۋ جانە تەرگەۋ ورتالىعى (كتتو) مالىمدەدى، - دەپ حابارلايدى "ادىرنا" ۇلتتىق پورتالى.
«2024 جىلدىڭ 16 اقپانىندا بەلگىسىز بىرەۋلەر GitHub رەسۋرسىندا قىتايدىڭ قوعامدىق قاۋىپسىزدىك مينيسترلىگىنىڭ (MPS) مەردىگەرلەرىنىڭ ءبىرى قىتايلىق iSoon (aka Anxun) كومپانياسىنىڭ قۇپيا دەرەكتەرىنىڭ جاريالانىپ كەتكەنىن حابارلادى»، - دەدى كتتو.
ورتالىقتىڭ مالىمەتىنشە، حاكەرلەر زياندى باعدارلامالاردى، Windows, Mac, iOS جانە Android جۇيەسىنە ارنالعان تروياندىق باعدارلامالاردى، DDoS قىزمەتتەرىن، الەۋمەتتىك جەلى قولدانۋشىلارىن انونيميزاتسيالاۋ جۇيەلەرىن، Wi-Fi جەلىسىن بۇزۋ جابدىقتارىن جانە ت.ب. اقپاراتتاردى پايدالانعان.
"شابۋىل جاساۋشىلاردىڭ ماقساتى دەرەكتەر بازاسى سياقتى جالپى اقپارات جانە ناقتى تۇلعالاردىڭ ماقساتتى اقپاراتتارى بولدى.
ونىڭ ىشىندە حات الماسۋدى، قوڭىراۋلاردى جانە قوزعالىستى باقىلاۋعا مۇمكىندىك العان. دەرەكتەردى تالداۋ بارىسىندا ۇرلانعان اقپارات كولەمى تەرابايتپەن ولشەنگەنى انىقتالدى. قازاقستان، قىرعىزستان، موڭعوليا، پاكىستان، مالايزيا، نەپال، تۇركيا، ءۇندىستان، ەگيپەت، فرانتسيا، كامبودجا، رۋاندا، نيگەريا، گونكونگ، يندونەزيا، ۆەتنام، ميانما، فيليپپين جانە اۋعانستان ەلدەرىندەگى ينفراقۇرىلىم نىساندارىنىڭ اقپاراتتارىن باقىلاعان»، - دەلىنگەن حابارلامادا.
سونىمەن قاتار، IDNET جانە IDTV پايدالانۋشىلارىنىڭ ابونەنتتەردىڭ جەكە دەرەكتەرى بار بازا، سونداي-اق بجزق جانە «Air Astana» اۋە كومپانياسىنىڭ دەرەكتەرى جاريالاندى.
كتتو وسى حاكەرلەر توبىنىڭ قۇرباندارى كىمدەر ەكەنىن جانە ولار كىمگە كوبىرەك قىزىعۋشىلىق تانىتقانىن تەكسەردى. ءىستى تەكسەرۋ ناتيجەسىندە ءتارتىپ ساقشىلارعا دا ماقساتتى شابۋىلدار جاسالعانى انىقتالدى.
ۇقساس جاڭالىقتار
