قوعام بەلسەندىسى مۇحتار تايجان ايەلىن ءولتىردى دەپ ايىپتالعان بۇرىنعى ۇلتتىق ەكونوميكا ءمينيسترى قۋاندىق بيشىمباەۆ اكەسى - ءۋاليحان بيشىمباەتىڭ كومەگىنىڭ ارقاسىندا جازادان قۇتىلىپ كەتۋى مۇمكىن ەكەنىن ايتادى، دەپ حابارلايدى "ادىرنا" ۇلتتىق پورتالى.
22 اقپاندا بيشىمباەۆتىڭ ادۆوكاتتارعا بەرگەن سۇحباتىندا كىسى ولتىرمەگەنىن ايتىپ، ءوز كىناسىن مويىندامايتىنىن جەتكىزگەن.
وسى ماسەلەگە قاتىستى ساياساتكەر مۇحتار تايجان "ادۆوكاتتارمەن سۇحبات - قۋاندىق بيشىمباەۆتىڭ اتىن اعارتۋ ءۇشىن جاسالعان ۇلكەن ناۋقاننىڭ ءبىر بولىگى عانا" دەپ ەسەپتەيتىنىن ايتتى. ول بۇل ءىستىڭ باستاماشىسى ىقپالدى دەپۋتات، اكادەميك جانە كۇدىكتىنىڭ اكەسى ءۋاليحان بيشىمباەۆ ەكەنىنە سەنىمدى.
"مەن كىسى ولتىرۋشىلەردىڭ ءومىرىن ساقتاپ قالعان دارىگەرلەردى كىنالامايمىن. بۇل ولاردىڭ كاسىبى، مىندەتى جانە انتى. ولار كەز كەلگەن ادامدى ەمدەۋگە جانە قۇتقارۋعا مىندەتتى. مەن سونداي-اق كىسى ولتىرۋشىلەردى قورعايتىن ادۆوكاتتاردى دا كىنالامايمىن. بۇل دا ولاردىڭ كاسىبى، مىندەتى، انتى. ولار ءاربىر ادامدى قورعاۋعا مىندەتتى.
بىراق مەن بيشىمباەۆتىڭ اكەسى، اكادەميك، لاۋرەات، ەڭبەك سىڭىرگەن قايراتكەر، رەكتور جانە "نۇر-وتاننىڭ" دەپۋتاتى، نازارباەۆتىڭ دوسى ءۋاليحان بيشىمباەۆتى كىنالايمىن. ول مەملەكەت (حالىق) قارجىسىن توناۋشى ۇرىنى تاربيەلەپ، ءوسىردى. مۇنى سوت دالەلدەپ وتىر. سونىمەن قاتار ول نازارباەۆتىڭ ۇلىنا مەرزىمىنەن بۇرىن كەشىرىم جاساۋىنا قول جەتكىزگەنىنە سەنىمدىمىن. سوندىقتان قىلمىسكەر بوستاندىققا شىعىپ، ءوزىنىڭ جازالانبايتىنىنا سەنىمدى بولدى. ال بۇل جاعداي ۇلكەن تراگەدياعا اكەلدى.
قازىر كىشى بيشىمباەۆ ايەلى سالتانات نۇكەنوۆانى ەرەكشە قاتىگەزدىكپەن ءولتىردى دەگەن كۇدىككە ءىلىندى. ەندى، مىنە، باق ارقىلى ول ۇلىن اقتاۋ ناۋقانىن ۇيىمداستىرىپ وتىرعان اكە ەكەنىنە تاعى دا سەنىمدىمىن. بالاسىنىڭ ارەكەتىنە وكىنگەنى تۋرالى ءسوز جوق. ەگەر سوت قۋاندىقتىڭ كىناسىن دالەلدەسە، وندا اكەسىن بارلىق قۇرمەتى مەن اتاق-ماراپاتىنان ايىرۋدى تالاپ ەتۋ كەرەك. ونىڭ تاربيەسى جازىقسىز ادامنىڭ ولىمىنە اكەلدى. ول سالتانات پەن قۇرمەتكە لايىق ەمەس، ول سوگىس پەن ۇياتقا لايىق. بۇل بارلىق جەمقور اتا-انالارعا ساباق بولادى", - دەدى ساياساتكەر ءوز ويىن اشىق ايتىپ.
"ادىرنا" ۇلتتىق پورتالى
