باس پروكۋروردىڭ ورىنباسارى اسەت شىنداليەۆ ۇقك توراعاسىنىڭ بۇرىنعى ءبىرىنشى ورىنباسارى سامات ءابىشتىڭ ىسىنە جانە سىرتتاي ۇكىم شىعارىلعان ەكس-اكىم بەرگەي رىسقاليەۆتىڭ جەلىدە تاراعان سۋرەتىنە قاتىستى سۇراققا جاۋاپ بەردى، دەپ حابارلايدى "ادىرنا" ۇلتتىق پورتالى.
شىنداليەۆ سامات ءابىشتىڭ ءىسى سوتتا ەكەنىن ايتىپ، ونىڭ ازىرگە نە ىستەپ، نە قويىپ جۇرگەنىنە جاۋاپ بەرە المايتىنىن ايتتى:
"مەن بۇل ءىس سوتتا ەكەنىن بىلەم. ال ونىڭ قايدا، نە ىستەپ جۇرگەنىن... ول قازاقستاندا. تەرگەۋ كەزىندە ول "ەشقايدا كەتپەۋ جونىندە قولحاتپەن" جۇرگەن. بۇدان ءارى ايتا المايمىن، ويتكەنى بۇل ىسكە مەنىڭ دە رۇقساتىم جوق", - دەدى اسەت شىنداليەۆ ءماجىلىس كۋلۋارىندا.
سونىمەن قاتار جۋرناليستەر اسەت شىنداليەۆتەن “قازاقستاندا سوتتالعان بەرگەي رىسقاليەۆ قالايشا لوندوندا ەمىن-ەركىن ءجۇر؟” دەپ سۇرادى. اسەت شىنداليەۆ راسىندا دا، اتىراۋ وبلىسىنىڭ ەكس-اكىمىنە سىرتتاي ۇكىم شىققانىن، الايدا وكىنىشكە قاراي ۇلىبريتانيا مەن قازاقستان اراسىندا ونى ەكستراداتسيالاۋ بويىنشا ەشقانداي كەلىسىم جوقتىعىن ايتتى.
"ەگەر ءتيىستى كەلىسىم بولماسا، ءبىزدىڭ قۇقىق قورعاۋ ورگاندارى ەشتەڭە ىستەي المايدى. رەسمي ساۋال جولداڭىزدار. بالكىم، مۇنداي وتىنىمدەر جىبەرىلگەن دە شىعار. بىراق ونىڭ قالاي ورىندالعانىن بىلمەيمىن", – دەدى شىنداليەۆ.
