ۇلتتىق قاۋىپسىزدىڭ قىزمەتىنىڭ توراعاسىنىڭ ءبىرىنشى ورىنباسارى سامات ابىشكە قاتىستى ەشقانداي قىلمىستىق ءىس قوزعالعان جوق. بۇل تۋرالى “ادىرنا” ۇلتتىق پورتالى nege.kz سايتىنا سىلتەمە جاساپ حابارلايدى.
سامات ابىشكە قاتىستى قانداي دا ءبىر تەرگەۋ شارالارى جۇرگىزىلىپ جاتىر ما؟ دەگەن سۇراققا ۇقك-ءنىڭ بولىمشە باستىعى س.احمەتقاليەۆتەن جاۋاپ كەلدى.
«قازاقستان رەسپۋبليكاسى ۇلتتىق قاۋىپسىزدىك كوميتەتىندە س.س.ابىشكە قاتىستى قىلمىستىق ىستەر جوق ەكەنىن حابارلايمىز. وعان قانداي دا ءبىر ءىس جۇرگىزۋ شارالارىن قولدانۋ تۋرالى اقپارات جوق» دەپ جاۋاپ بەردى س.احمەتقاليەۆ.
سامات ساتىبالدىۇلى ءابىش – قازاقستاننىڭ ەكس-پرەزيدەنتى نۇرسۇلتان نازارباەۆتىڭ ءىنىسى ساتىبالدى نازارباەۆتىڭ ۇلى. اعاسى – قايرات ساتىبالدى. 2000 جىلدان ۇقك سالاسىندا قىزمەت اتقارعان. 2015 جىلدىڭ جەلتوقسانىنان باستاپ ۇقك توراعاسىنىڭ ءبىرىنشى ورىنباسارى لاۋازىمىندا بولدى. ۇقك-ءنىڭ گەنەرال-لەيتەنانتى. 2022 جىلى 17 قاڭتاردا قىزمەتىنەن بوساتىلدى. قىزمەتتەن بوساتۋ سەبەبى ايتىلمادى.
ەستەرىڭىزگە سالا كەتەيىك، قازىرگى ۋاقىتتا قر ۇقك ەكس-باسشىسى كارىم ءماسىموۆ قاماۋعا الىنعان. وعان قاتىستى ساتقىندىق فاكتىسى بويىنشا قىلمىستىق ءىس تەرگەلۋدە.
ۇلتتىق قاۋىپسىزدىك كوميتەتى بيلىكتى كۇشپەن باسىپ الۋعا جانە لاۋازىمدىق وكىلەتتىگىن اسىرا پايدالانۋعا باعىتتالعان ءىس-ارەكەتتەر فاكتىلەرى بويىنشا سوتقا دەيىنگى تەرگەۋ باستالعانىن حابارلادى.
اتالعان قىلمىستاردى جاسادى دەگەن كۇدىكپەن بۇرىنعى ورىنباسارلارى – «ارىستان» ارنايى ماقساتتاعى قىزمەتىنىڭ باستىعى ءانۋار سادىقۇلوۆ پەن داۋلەت ەرعوجين دا ۇستالدى.
”ادىرنا” ۇلتتىق پورتالى
