Ulttyq qaýipsizdiń qyzmetiniń tóraǵasynyń birinshi orynbasary Samat Ábishke qatysty eshqandaı qylmystyq is qozǵalǵan joq. Bul týraly “Adyrna” ulttyq portaly nege.kz saıtyna silteme jasap habarlaıdy.
Samat Ábishke qatysty qandaı da bir tergeý sharalary júrgizilip jatyr ma? degen suraqqa UQK-niń bólimshe bastyǵy S.Ahmetqalıevten jaýap keldi.
«Qazaqstan Respýblıkasy ulttyq qaýipsizdik komıtetinde S.S.Ábishke qatysty qylmystyq ister joq ekenin habarlaımyz. Oǵan qandaı da bir is júrgizý sharalaryn qoldaný týraly aqparat joq» dep jaýap berdi S.Ahmetqalıev.
Samat Satybaldyuly Ábish – Qazaqstannyń eks-prezıdenti Nursultan Nazarbaevtyń inisi Satybaldy Nazarbaevtyń uly. Aǵasy – Qaırat Satybaldy. 2000 jyldan UQK salasynda qyzmet atqarǵan. 2015 jyldyń jeltoqsanynan bastap UQK tóraǵasynyń birinshi orynbasary laýazymynda boldy. UQK-niń general-leıtenanty. 2022 jyly 17 qańtarda qyzmetinen bosatyldy. Qyzmetten bosatý sebebi aıtylmady.
Esterińizge sala keteıik, qazirgi ýaqytta QR UQK eks-basshysy Kárim Másimov qamaýǵa alynǵan. Oǵan qatysty satqyndyq faktisi boıynsha qylmystyq is tergelýde.
Ulttyq qaýipsizdik komıteti bılikti kúshpen basyp alýǵa jáne laýazymdyq ókilettigin asyra paıdalanýǵa baǵyttalǵan is-áreketter faktileri boıynsha sotqa deıingi tergeý bastalǵanyn habarlady.
Atalǵan qylmystardy jasady degen kúdikpen burynǵy orynbasarlary – «Arystan» arnaıy maqsattaǵy qyzmetiniń bastyǵy Ánýar Sadyqulov pen Dáýlet Erǵojın da ustaldy.
”Adyrna” ulttyq portaly
