Bas prokýratýra Nursultan Nazarbaevtyń nemere inisi, Ulttyq qaýipsizdik komıteti tóraǵasynyń eks-birinshi orynbasary Samat Ábishtiń ne sebepti 8 jylǵa shartty merzimge sottalǵanyn túsindirdi, dep habarlaıdy «Adyrna» tilshisi QazTAG-qa silteme jasap.
«Sot sottalýshynyń óz kinásin moıyndaýy men onyń shyn júrekten ókinýin jazany jeńildetetin mán-jaılar dep tanydy. Ábish qylmystyq quqyq buzýshylyqty ashýǵa belsendi úles qosty. Qylmysqa qatysy bar, alaıda kinásin moıyndamaǵan basqa da adamdardy áshkereledi»,—delingen habarlamada.
Budan bólek eks-sheneýniktiń kámeletke tolmaǵan 5 balasynyń bolýy da eskerilgen.
Bas prokýratýra Qylmystyq kodekstiń 362-baby boıynsha shartty jaza qoldanylmaıdy degen aqparattyń qate ekenin málimdedi.
Sot Samat Ábishti Qylmystyq kodekstegi «Qyzmetin asyra paıdalaný» babymen (362-baptyń 4-tarmaǵy) aıypty dep taýyp, 10 jylǵa laýazymdy qyzmet atqarý quqyǵynan aıyryp, 8 jylǵa bas bostandyǵynan aıyrǵan. Al Qylmystyq kodekstiń 63-babymen («Shartty túrde sottaý») shartty jazaǵa aýystyrǵan.
«Ábish jasaǵan qylmystan sybaılas jemqorlyq faktileri anyqtalmady. Sol sebepti Qylmystyq kodekstiń 63-babyn osy qylmystyq is boıynsha qoldanýǵa zańnamalyq shekteýler bolǵan joq. Aıyptaý úkimin shyǵarý kezinde istiń barlyq mán-jaı zerdelendi»,—dep tolyqtyrdy Bas prokýratýra.
Eske salaıyq, 19 naýryzda Samat Ábishtiń jabyq sot sheshimimen shartty túrde sottalǵany belgili bolǵan edi.
