رەسەي قازاقستاننىڭ سارى-شاعان پوليگونىندا 200 شاقىرىمعا دەيىن ۇشاتىن زىمىرانداردى سىناقتان وتكىزۋدە. بۇل تۋرالى قازاقستان رەسپۋبليكاسى قورعانىس ءمينيسترىنىڭ ورىنباسارى شايح-حاسان جازىقباەۆ مالىمدەدى، دەپ حابارلايدى “ادىرنا” ۇلتتىق پورتالى informburo.kz سايتىنا سىلتەمە جاساپ.
«نوۆايا گازەتا – ەۋروپا» رەسەيلىك «كاپۋستين يار» زىمىران پوليگونىنان حابار جاريالاعان بولاتىن. باسىلىمنىڭ مالىمەتىنشە، وندا سىناقتان ءوتىپ جاتقان زەنيتتىك جانە بالليستيكالىق زىمىراندار قازاقستانعا قاراي ۇشىپ، بوكەيوردا رەزەرۆىنە تۇسەدى. رەداكتسيالار بۇل زىمىراندار كەيىن ۋكرايناداعى اسكەري وپەراتسيالار كەزىندە قولدانىلاتىنىن باسا ايتتى.
ءماجىلىس الاڭىندا ءمينيستردىڭ ورىنباسارى اقپاراتقا تۇسىنىكتەمە بەردى.
«مۇنداي پوليگون بار، بىراق ۇشقىشسىز زىمىراندار جوق. كادىمگى زىمىراندار قولدانىلادى. سارى-شاعان پوليگونى بار، 1993 جىلى كەلىسىم بويىنشا 2030 جىلعا دەيىن سىناقتان ءوتىپ جاتىر. رەسەي فەدەراتسياسىنىڭ 110 وقۋ ورتالىعى. زىمىراننىڭ قاشىقتىعى 200 كم-گە دەيىن. بۇل ۋچاسكەدە ينفراقۇرىلىم جوق، جەرگىلىكتى تۇرعىندار دا جوق»، - دەدى شايح-حاسان جازىقباەۆ.
سونداي-اق، ول جىلىنا بارلىعى 50 ساعات تەستىلەۋ جۇرگىزىلەتىنىن ايتتى. ايتۋىنشا، بۇكىل قازاقستان بويىنشا رەسەي ارمياسىنىڭ 900 وكىلى بار.
جۋرناليستەر “بۇل زىمىراندار بولاشاقتا ۋكرايناداعى اسكەري وپەراتسيالاردا قولدانىلا ما” دەگەن سۇراق قويدى. شايح-حاسان جازىقباەۆ قازاقستان رەسپۋبليكاسىنىڭ قورعانىس مينيسترلىگىندە مۇنداي دەرەكتەر جوق ەكەنىن ءتۇسىندىردى.
