قازاقستان سىرتقى ىستەر ءمينيسترى باسشىسىنىڭ ورىنباسارى رومان ۆاسيلەنكو رەسەي قورعانىس ءمينيسترى سەرگەي شويگۋدىڭ ورتالىق ازياداعى ۇەۇ "رەسەيگە قارسى قىزمەتپەن اينالىسادى"دەگەن مالىمدەمەسىنە جاۋاپ بەردى، دەپ حابارلايدى “ادىرنا” ۇلتتىق پورتالى.
رومان ۆاسيلەنكو ازاماتتىق سەكتور مەن ۇەۇ-نى قولداۋ پرەزيدەنت پەن ۇكىمەت ءۇشىن ماڭىزدى باسىمدىق ەكەنىن ەسكە سالدى.
– ەگەر دۇرىس ەسىمدە بولسا، ءبىزدىڭ ەلىمىزدە 18 مىڭ ۇكىمەتتىك ەمەس ۇيىم بار. ولار زاڭناماعا سايكەس ارەكەت ەتەدى ءارى ءبىزدىڭ قوعامنىڭ وتە ماڭىزدى بولىگى سانالادى. ياعني، ازاماتتىق قوعامدى مەملەكەت قولدايدى، - دەدى ول.
بۇعان دەيىن رەسەي قورعانىس ءمينيسترى سەرگەي شويگۋ كرەملدىڭ كيەۆكا قارسى سوعىسىنا مەڭزەپ، ورتالىق ازيا ەلدەرىندە رەسەيمەن اسكەري-تەحنيكالىق، ەكونوميكالىق جانە مادەني ىنتىماقتاستىعىن السىرەتۋ ءۇشىن ماسكەۋگە قارسى ارەكەتتەر بوي كوتەرگەنىن مالىمدەگەن.
– ءبىز ولاردىڭ الدىن الۋ شارالارىن قابىلدايمىز، - دەگەن رەسەي ءمينيسترى سەرگەي شويگۋ.
