«اتامۇرا» باسپاسى Facebook جەلىسىندە دوساي كەنجەتايدىڭ «الىپپەگە» قاتىستى بەينەجازباسىنا تۇسىنىكتەمە بەردى، دەپ حابارلايدى «ادىرنا» ءتىلشىسى.
«2022 جىلدىڭ 8 قاراشا كۇنى دوساي كەنجەتاي ءوز پاراقشاسىندا «قايتقان «الىپپە» تۋرالى» دەگەن تاقىرىپپەن بەينەجازبا بەرگەن بولاتىن. سول شىندىققا جاناسپايتىن بەينەجازبانى تۇسىنبەستەن باسقا پاراقشا يەلەرى ءدال بۇگىنگە دەيىن 84 رەت كوشىرىپ جاريالاپ وتىر. بۇعان دەيىن «اتامۇرا» باسپاسى مەن رەسپۋبليكالىق عىلىمي-پراكتيكالىق ءبىلىم مازمۇنىن ساراپتاۋ ورتالىعى: «...قايتقان الىپپە» دەپ كەزدەيسوق ادامنىڭ ۆيدەوسىنداعى كىتاپتى كوپشىلىككە جاريالاۋىڭىز دۇرىس بولمادى. سوندىقتان پاراقشاڭىزعا وسى پوستتى تەرىستەپ جازىپ، ۆيدەونى ءوشىرۋىڭىزدى سۇرايمىز»، – دەپ جازعان بولاتىن. ءوتىنىشتىڭ ەسكەرۋسىز قالدىرۋىنا بايلانىستى «اتامۇرا» كورپوراتسياسى وسى جازباعا قاتىستى ءوز نارازىلىعىن تاعى دا بەينەجازبا اۆتورىنا جولدايدى»،—دەلىنگەن حابارلامادا.
باسپا نەگىزسىز جازبالار كوپشىلىكتى شاتاستىراتىنىن اتاپ ءوتتى.
«بايىبىنا بارماعان بايبالام مەكتەپ وقۋشىلارىنىڭ اتا-انالارىن، بۇكىل قوعامدى شاتاستىرادى. بەينەجازبادا ءوزى كورىنبەيتىن ايەل، شاماسى، وقۋشىنىڭ اناسى شىعار، الدەبىر «الىپپە» دەگەن كىتاپتى پاراقتاپ، ونىڭ بەتىندەگى ءارىپ پەن اتاۋى سول ارىپتەن باستالاتىن اڭدى كورسەتىپ، «بۇل ساۋاتىن اشاتىن قازاق بالاسىنا ساي ەمەس» دەپ سىنايدى.
«پ» ارپىنە پاندانى، «ۋ» ارپىنە ۋلى جىلاندى ءبىر بەت ەتىپ سالعان «الىپپەنى»، انىعىندا «الىپپە-سىماقتى» مۇلدە باسقا باسپا شىعارعان. ءارى ول مەكتەپ باعدارلاماسىنىڭ رەسمي وقۋلىعى ەمەس. بەينەجازبادا ساۋساعى مەن داۋىسى بار ايەلدىڭ وسىنىڭ اق-قاراسىن اجىراتۋعا زەردەسى جەتپەگەن شىعار، ال بەلگىلى جوعارى وقۋ ورنىنىڭ بىلدەي پروفەسسورىنىڭ «قايتقان «الىپپە» تۋرالى» دەپ تۇسىنىك بەرە وتىرىپ، ونى ءوز پاراقشاسىنا قويعانى قالاي؟»،—دەپ جازدى كورپوراتسيا.
«اتامۇرانىڭ» مالىمدەۋىنشە، بەينەجازباداعى كىتاپ جالپى ءبىلىم بەرەتىن مەكتەپتىڭ 1-سىنىبىنا ارنالماعان.
«قالىڭ قاۋىمنىڭ تالاپ ەتۋىمەن 2021 جىلى «الىپپە» مەكتەپكە قايتا ورالدى. مەكتەپ تابالدىرىعىن اتتاعان جاس ۇرپاق سول «الىپپە» ارقىلى ءبىلىم الۋدى باستاعالى ءۇشىنشى وقۋ جىلى ءوتىپ جاتىر. بىراق اتى-ءجونى بەلگىسىز ايەلدىڭ ساۋساقتارى كورسەتىپ تۇرعان، دوساي كەنجەتاي مىرزا «قايتقان «الىپپە» دەپ مىسقىلداعانى وقۋ-اعارتۋ مينيسترلىگى ۇسىنعان، جالپى ءبىلىم بەرەتىن مەكتەپتىڭ 1-سىنىبىنا ارنالعان «الىپپە» ەمەس.
شىندىعىندا، «اتامۇرا» باسپاسىنان شىعىپ، بۇلدىرشىندەرىمىزگە قايتا ورالعان جاڭا «الىپپە» مۇلدە باسقا.
ساراپتامادان وتپەگەن، مينيسترلىك تىزىمىنە ەنبەگەن كەز كەلگەن كىتاپ نەمەسە كىتاپشانى «الىپپە» دەپ حالىققا ۇسىنۋعا بولمايدى. «الىپپە» اتاۋىمەن شىققان بۇل كىتاپشا قولدانىستاعى «الىپپەگە» ءۇش قايناسا سورپاسى قوسىلمايدى. تۇركىستانداعى ۋنيۆەرسيتەت پروفەسسورى دوساي تۇرسىنبايۇلى كەنجەتاي مىرزانىڭ مۇنداي بايىبىنا بارماعان بايبالامدى نەگە پاراقشاسىنا شىعارعانى تۇسىنىكسىز. وعان «قايتقان «الىپپە» تۋرالى» دەپ ءوز تاراپىنان ءسوز قوسقانى – جالعان اقپارات تاراتۋ بولىپ سانالادى. قر قىلمىستىق كودەكسىنىڭ «كورىنەۋ جالعان اقپارات تاراتۋ» 274-بابى بويىنشا دوساي تۇرسىنبايۇلى كەنجەتايدىڭ الەۋمەتتىك جەلىدە جالعان اقپارات تاراتقانى ءۇشىن زاڭ الدىندا جاۋاپ بەرۋىن تالاپ ەتىپ، قۇقىق قورعاۋ ورگاندارىنا جۇگىنەتىنىمىزدى حابارلايمىز»،—دەپ تولىقتىردى باسپا.
