جوعارى وقۋ ءمينيسترى ساياسات نۇربەك ۋنيۆەرسيتەت رەكتورلارىن اقش-تاعى پرەزيدەنت سايلاۋى سەكىلدى ەكى مەرزىمگە شەكتەيتىنىن ايتتى، دەپ حابارلايدى "ادىرنا" ۇلتتىق پورتالى.
ءماجىلىستىڭ جالپى وتىرسىنان كەيىن جۋرناليستەر ساياسات نۇربەككە «بيىل ەۋرازيا ۋنيۆەرسيتەتىنىڭ رەكتورى ەرلان سىدىقوۆتىڭ رەكتور بولعانىنا 13 جىل تولادى ەكەن. بۇل تىم ۇزاق ۋاقىت ەمەس پە؟ رەكتوردىڭ 13 جىل وتىرۋى دۇرىس پا، دۇرىس ەمەس پە؟» دەپ سۇراق قويدى.
«بىزدە ۇلتتىق ۋنيۆەرسيتەتتىڭ رەكتورلارىنىڭ بازالىق كەلىسىم شارتىنىڭ مەرزىمى 3 جىل. مەرزىمدى پرەزيدەنت اكىمشىلىگىمەن كەلىسىپ، ۇزارتۋعا شەشىم قابىلدانادى. شىن مانىندە، 13 جىل ۇزاق مەرزىم. سول سەبەپتى ءبىز قازىرگى ۋاقىتتا رەكتورلاردىڭ تاعايىنداۋ قاعيداتتارى مەن ەرەجەلەرىن پىسىقتاپ جاتىرمىز. 14-15 ناۋرىزدا، ياعني ءبىر اپتادان كەيىن رەسپۋبليكالىق كوميسسيا وتىرىسى بولادى. سول وتىرىستا ناقتىلايمىز. رەكتورلاردى اقش-تاعى پرەزيدەنت سەكىلدى ەكى مەرزىممەن شەكتەيمىز»، – دەدى ول.
ءجۋرناليستىڭ «دەمەك الداعى ۋاقىتتا ەرلان سىدىقوۆ رەكتورلىقتان كەتۋى مۇمكىن مە؟» دەگەن قوسىمشا ساۋالىنا مينيستر «جيىندا وسى پرينتسيپتەردى قاراستىرامىز. رەسپۋبليكالىق كوميسسيا ماقۇلداعان جاعدايدا زاڭنامالىق وزگەرىستەردى ەنگىزەمىز. قازىر مەن ناقتى ايتا المايمىن. بارلىعى زاڭ تۇرعىسىندا بولادى. بىراق ايتقانىمداي، مەرزىمسىز وتىرۋ دۇرىس ەمەس ەكەنىنە كەلىسەمىن» دەپ جاۋاپ بەردى.
سونداي-اق جۋرناليست «كەيبىر ادامدار ءمينيستردىڭ شاماسى ۇلتتىق ۋنيۆەرسيتەتتەردىڭ رەكتورلارىنا جەتپەيدى» دەپ ايتىپ جاتادى. بۇل ءسوز قانشالىقتى راس؟» دەپ سۇراق قويدى.
«بىرىنشىدەن، مينيسترلىك سوڭعى ون جىلدىقتا ارنايى اكادەميا اۆتونوميا پرينتسيپتەرىنە كوشۋدە. ياعني، قازىر مينيسترلىك رەكتورلاردى تىكەلەي تاعايىنداپ، باسقارىپ وتىرمايدى. ول پرينتسيپتەن باس تارتتىق. ءبىز شەتەلدىك فورماتقا كوشىپ جاتىرمىز. رەكتورلارمەن ديرەكتورلار كەڭەسى نەمەسە قامقورشىلىق كەڭەس ارقىلى جۇمىس ىستەيمىز. مىسالى 3 جىلدىق ستراتەگياسىن، 1 جىلدىق جوسپارىن كەلىپ ۇسىنادى. بۇرىنعىداي مينيسترلىك باسقاراتىن، كەز كەلگەن جاعدايدا رەكتور جانىندا وتىرۋى كەرەك جانە قيت ەتسە، استاناعا كەلىپ، جينالىستا وتىرۋى كەرەك دەگەن ۇستانىمنان باس تارتتىق. بۇل ءبىزدىڭ ۇستانىمىمىز، پايىمىمىز. مىسالى، اپپاراتتىق كەڭەيتىلگەن جينالىستارىمىزدى قازىرگى ۋاقىتتا ZOOM ارقىلى وتكىزەمىز»، – دەدى مينيستر.
نازەركە ساندىبەكقىزى
