شىعىس قازاقستان وبلىسىندا جوعارى لاۋازىمدى شەنەۋنىكتىڭ تۋىسى ادام ءولتىردى دەگەن كۇدىككە ءىلىندى، دەپ حابارلايدى "ادىرنا" ۇلتتىق پورتال اگەنتتىك ءتىلشىسى.
«قۇرمەتتى پرەزيدەنت توقاەۆ قاسىم-جومارت كەمەلۇلى، باس پروكۋرور بەرىك اسىلوۆ، ىشكى ىستەر ءمينيسترى ەرجان سادەنوۆ، سىزدەردەن كومەك سۇرايمىز. مەن سۇلتانوۆا سايا جاراسقىزى، مارقۇم كوشەروۆ جاراس سۇلتانۇلىنىڭ قىزىمىن. كومەككە جۇگىنۋ سەبەبىمىز قۇقىق قورعاۋ ورگاندارى كۇنى بۇگىنگە دەيىن ارەكەتسىزدىك تانىتۋدا»، - دەدى مارقۇمنىڭ قىزى ۆيدەو حابارلاماسىندا.
2 ناۋرىزدا شىعىس قازاقستان وبلىسى مارقاكول اۋدانى قالجىر اۋىلىندا جەرگىلىكتى تۇرعىن جاراس كوشەروۆ كىسى قولىنان قازا تاپتى. مارقۇمنىڭ تۋىستارى ونىڭ ولىمىنە بۇرىن كىسى ولتىرگەنى ءۇشىن سوتتى بولعان باۋىرجان نۇرمۇحانوۆتان كۇدىكتەنىپ وتىر.
«كۇدىكتى بۇعان دەيىن دە 2 ادامدى ءولتىرىپ، ءبىر جولىندا ۋسلوۆنو السا، كەلەسى قىلمىسى ءۇشىن 3,5 جىل عانا وتىرعان. سەبەبى، ونىڭ تۋىستارى وتە اۋقاتتى جانە ىقپالدى ادامدار بولعاندىقتان دەپ ويلايمىن. نۇرمۇحانوۆتىڭ اعاسى نۇرمۇحانوۆ باقىت ماراتۇلى كونستيتۋتسيالىق سوت توراعاسىنىڭ ورىنباسارى بولىپ جۇمىس ىستەيدى، تاعى ءبىر اعاسى مۇرات نۇرمۇحانوۆ پروكۋراتۋرا قىزمەتكەرى. كۇرشىم ءبولىمىنىڭ مەڭگەرۋشىسى نۇرمۇحانوۆتار وتباسىمەن جاقسى قارىم-قاتىناستا. اۋداندىق پروكۋراتۋرانىڭ ورىنباسارى كۇدىكتىنىڭ تانىسى، ول دا ءمايىتحانادا جانە كۋاگەرلەردەن جاۋاپ الۋ كەزىندە بولعان»، - دەيدى تۋىستارى.
ولار بۇل قىلمىستىق ءىستىڭ ادام ءولتىرۋ ەمەس، «دەنساۋلىققا اۋىر زيان كەلتىرۋ» بويىنشا تىركەلگەنىن ايتىپ، جىلى جابىلا سالا ما دەپ قورقادى.
«كىسى ءولتىرۋ 2 ناۋرىزدا بولدى، بىراق وسى كۇنگە دەيىن نۇرمۇحانوۆ باۋىرجان ءالى ۇستالعان جوق نەمەسە كۇدىكتى رەتىندە تانىلعان دا جوق، بىراق كۋاگەرلەر بار. ەشقانداي شارا قولدانىلىپ جاتقان جوق»، – دەيدى مارقۇمنىڭ قىزى.
