اقتوبە وبلىسىنداعى تاسجولدا بولعان جانتۇرشىگەرلىك جول اپاتىنا قاتىستى جاڭا دەرەك شىقتى، دەپ حابارلايدى "ادىرنا" ءتىلشىسى Dalanews-قا سىلتەپ.
ادام ولىمىمەن اياقتالعان جول اپاتى كۇنى كەشە بولدى.
وبلىس اكىمدىگىنىڭ Telegram-ارناسىنداعى جازباعا سايكەس اقتوبە - استراحان تاسجولىنىڭ 120 شاقىرىمىندا Lada Largus جانە Toyota Hilux ماركالى ەكى كولىك سوقتىعىسقاننان سوڭ Lada Largus كولىگى ورتەنگەن.
"2024 جىلعى 6 ناۋرىزدا اقتوبە وبلىسىنىڭ "اقتوبە-استراحان" تاسجولىندا 120 شاقىرىمىندا كولىك اپاتى بولدى. زارداپ شەككەندەردىڭ سانى – 11, ونىڭ ىشىندە 8 ادام قازا تاپتى. 3 ادام مۇعالجار اۋداندىق اۋرۋحاناسىنا جەتكىزىلدى. ماماندار ولارعا قاجەتتى كومەكتى كورسەتىپ، تەكسەردى. الايدا، 3 ادام اقتوبە قالاسىندا "تەكسەرۋدەن وتەمىز" دەپ، اۋرۋحاناعا جاتۋدان
باس تارتقان", - دەدى اقتوبە وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى نۇربول تىمپيەۆ.
وبلىستىق ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆا دا وقيعاعا قاتىستى پىكىر ءبىلدىردى.
"بۇگىن اقتوبە-استراحان تاسجولىندا قايعىلى جول-كولىك وقيعاسى بولدى. وسى قايعىلى وقيعا سالدارىنان 8 ادام قازا تاپتى. ونىڭ تورتەۋى كامەلەتكە تولماعان بالالار. اتاپ ايتقاندا، شۇبارشى ورتا مەكتەبىنىڭ 4-6-سىنىپ وقۋشىلارى. سونداي-اق كەڭقياق ورتا مەكتەبىنىڭ 6-سىنىپ وقۋشىسى مەن دايىندىق توبىنىڭ 1 وقۋشىسى. بالالاردى اتا-انالارى مەن تۋىستارىمەن بىرگە بولدى. وقۋشىلار زاڭدى وكىلدەرىنىڭ ءوتىنىشى بويىنشا وتباسىلىق جانە دەنساۋلىق جاعدايىنا بايلانىستى ساباققا قاتىسپاعان", - دەپ ءتۇسىندىردى نۇرگۇل بەرتىلەۋوۆا.
