ناۋرىز مەرەكەسى قارساڭىندا «سامۇرىق-قازىنا» اق كومپانيالار توبى تاراپىنان اباي اتىنداعى وبلىستىق امبەباپ كىتاپحانادا زاماناۋي قوعامدىق كەڭىستىك سالتاناتتى تۇردە اشىلىپ، سەمەي قالاسىنىڭ زاعيپ جانە ناشار كورەتىن ازاماتتارعا ارنالعان كىتاپحاناسىنا ارنايى تەحنيكالىق قۇرال-جابدىقتار تابىستالدى.
بۇل قادامدار «اباي وبلىسىنىڭ كىتاپحانالارىن جاڭعىرتۋ» جوباسى اياسىندا باس دەمەۋشى، «سامۇرىق-قازىنا» اق كومپانيالار توبىنىڭ بىرىڭعاي قايىرىمدىلىق وپەراتورى – «Samruk-Kazyna Trust» قورىنىڭ «كەمەلدى قادام» قوعامدىق قورىمەن سەرىكتەستىگى ارقىلى جۇزەگە استى.
زاماناۋي كىتاپحانالار ونىڭ ماتەريالدىق-تەحنيكالىق جاي-كۇيى، كوۆوركينگ ايماقتارىنىڭ قىزمەتى حالىق سۇرانىسىنا سايكەس بولۋى قاجەت. سوندىقتان، جوبانىڭ نەگىزگى ماقساتى – ءبىلىم بەرۋدىڭ زاماناۋي ينتەراكتيۆتى جانە كوممۋنيكاتيۆتى تۇرلەرىن قۇرۋ ارقىلى وقىرمانداردىڭ زياتكەرلىك دەمالىسقا دەگەن قىزىعۋشىلىعىن ارتتىرۋ.
«قازاق حالقىنا اباي قۇنانبايۇلى، شاكارىم قۇدايبەردىۇلى، مۇحتار اۋەزوۆ سىندى ۇلى تۇلعالاردى سىيلاعان وبلىسىمىزدىڭ رۋحاني ومىرىنە قولداۋ كورسەتكەن «سامۇرىق-قازىنا» اق باسشىلىعىنا العىس ايتامىز. جوبا اباي وبلىسى جاستارىنىڭ شىعارماشىلىق، رۋحاني جانە مادەني الەۋەتىن ودان ءارى دامىتۋعا كومەكتەسەدى دەپ سەنەمىز.جاس بۋىن كىتاپحانامەن دوس بولىپ، ادەبيەت الەمىنە اۋەستىكتەرىن تۋدىرۋ ءۇشىن،وسىنداي شارالاردىڭ ماڭىزى زور»، - دەدى ءوز سوزىندە اباي وبلىسى اكىمىنىڭ ورىنباسارى ادىلبەك مۇساباەۆ.
زاماناۋي كىتاپحانالاردىڭ ماتەريالدىق-تەحنيكالىق جاي-كۇيى، كوۆوركينگ ايماقتارى حالىق سۇرانىسىنا سايكەس بولۋى قاجەت. سوندىقتان، جوبانىڭ نەگىزگى ماقساتى – زاماناۋي ينتەراكتيۆتى جانە كوممۋنيكاتيۆتى تۇرلەرىن پايدالانۋ ارقىلى جاس وقىرمانداردىڭ وقۋ-بىلىمگە دەگەن قىزىعۋشىلىعىن ارتتىرۋ.
«جوبا اياسىندا سەمەي قالاسىنىڭ ەكى كىتاپحاناسىنا قايىرىمدىلىق كومەك كورسەتىلدى. اباي اتىنداعى وبلىستىق امبەباپ كىتاپحاناسىندا بارلىق قالا تۇرعىندارى ءۇشىن تەگىن بالالارعا ارنالعان قوعامدىق يننوۆاتسيالىق روبوتوتەحنيكا زەرتحاناسى، كوۆوركينگ-وقۋ زالى مەن ويىن-شىعارماشىلىق الاڭى اشىلدى. ال ناشار كورەتىن ازاماتتارعا ارنالعان كىتاپحانا ەندى ءوز وقىرماندارىنا بەدەرلى-نۇكتەلى قارىپپەن كىتاپ شىعارۋعا، قىزمەتتەردىڭ كەڭەيتىلگەن اۋقىمىن كورسەتۋگە جانە باسقا دا جەرلەردە شارالار وتكىزۋگە قاۋقارلى», - دەدى «كەمەلدى قادام» قق ءتورايىمى گاۋھار كارمەنوۆا.
بەلگىلى اقىن، قر مەملەكەتتىك سىيلىعىنىڭ لاۋرەاتى، جازۋشىلار وداعىنىڭ مۇشەسى، ت.ايبەرگەنوۆ اتىنداعى سىيلىقتىڭ لاۋرەاتى ت.ابدىكاكىمۇلى : «جاقسى مامان تاربيەلەۋ ءۇشىن، جاقسى ادام تاربيەلەۋ كەرەك.ول ءۇشىن بالا جاسىنان كىتاپتى كوپ وقۋى كەرەك. كوپ وقىعان ادام، كوپ بىلەدى.سوزدىك قورى قالىپتاسادى.ءبىز بالالارىمىزدى ساۋاتتىلىققا تاربيەلەۋىمىز قاجەت» دەي كەلە، يگى شاراعا مۇرىندىق بولعان «Samruk-Kazyna Trust» قورىنا، «كەمەلدى قادام» قوعامدىق قورىنىڭ ءتورايىمى گ.كارمەنوۆاعا العىسىن جەتكىزدى.
وبلىستىق كىتاپحاناداعى «Samruk-Kazyna Trust» تاراپىنان 54,6 ميلليون تەڭگە قاراستىرىلعان كەڭىستىكتە «سيقىرلى قىلقالام»، «شەبەر قولدار»، «قۇم-ارت تەراپياسى» سىندى ۇيىرمەلەرگە قاجەتتى ۇستەل مەن ورىندىقتار، سۋرەت سالاتىن ىڭعايلى مولبەرتتەر، قۇممەن سۋرەت سالۋ ءۇشىن ارنايى ۇستەلدەر، كىتاپ سورەلەرى مەن جۇمساق جيھاز سىيعا تارتىلسا، وقۋ زالى-كوۆوركينگ ارنايى كىتاپ سورەلەرىمىن، جيھازبەن جابدىقتالىپ، وقۋ باعدارلاماسىن جۇزەگە اسىرۋ ءۇشىن نوۋتبۋكتەر، جاس وقىرماندارعا شارالار وتكىزۋدە پايدالانۋ ءۇشىن پروەكتور قولدانىسقا بەرىلدى. يننوۆاتسيالىق روبوتوتەحنيكا زەرتحاناسى كومپيۋتەرلەرمەن، نوۋتبۋكتەرمەن، پروەكتورمەن، سكانەرمەن، 3D-پرينتەر، روبوت، كونسترۋكتور سىندى روبوتوتەحنيكانى ۇيرەنۋگە ارنالعان جيناقتارمەن، ينتەراكتيۆتى ۇستەلدەرمەن قامتاماسىز ەتىلدى.
بۇگىندە وبلىستىق كىتاپحانا ەرەسەك وقىرمانداردى ەسەپتەمەگەندە، 2500-دەن استام بالاعا قىزمەت كورسەتە الادى.
«كىتاپحانانى جاڭعىرتۋ ناتيجەسىندە بالالار مەن جاسوسپىرىمدەردىڭ زياتكەرلىك دامۋىنا، ولاردىڭ مادەني بوس ۋاقىتىن ءتيىمدى وتكىزۋىنە، شىعارماشىلىق جوسپارلار مەن كرەاتيۆتى يدەيالاردى جۇزەگە اسىرۋىنا ارنالعان جاڭا تارتىمدى كەڭىستىكتەر مەن الاڭدار پايدا بولدى. جاڭا ورتا جاس وقىرمانداردىڭ وزدىگىنەن ءبىلىم الۋىنا، كىتاپقا، شىعارماشىلىققا دەگەن قىزىعۋشىلىقتارىن ارتتىرۋعا سەپتىگىن تيگىزەتىنى انىق»، - دەدى وبلىستىق اباي اتىنداعى امبەباپ كىتاپحاناسىنىڭ ديرەكتورى مەرەي قارت.
بۇعان دەيىن كوزى كورمەيتىن جانە ناشار كورەتىن ازاماتتارعا ارنالعان ارنايى كىتاپحانا بەيىمدەلگەن سيپاتتاعى مامانداندىرىلعان كىتاپتاردان قينالىپ كەلدى. قازاقستاندا ونداي باسپاحانا جوق. جوبا ارقىلى كىتاپحانا 17,4 ملن تەڭگەگە تاكتيلدى كىتاپتاردى باسىپ شىعارۋعا ارنالعان جابدىقتار جيىنتىعىمەن، كەڭسە تەحنيكاسىمەن، جەكە تىڭداۋ جابدىقتارىمەن، دىبىستىق اپپاراتۋرامەن جانە جيھازبەن جابدىقتالدى. ەندى ارنايى مەكەمە قازاق تىلىندە برايل قارپىمەن كىتاپتار شىعارۋعا قابىلەتتى ەلىمىزدەگى ءبىرىنشى كىتاپحانا بولماق.
“بۇگىنگى ناۋرىزناما ونكۇندىگى اياسىندا قايىرىمدىلىق جاساۋ يگى شاراسىنىڭ كۋاسى بولىپ وتىرعانىما قۋانىشتىمىن. كورۋ قابىلەتى بۇزىلعان ازاماتتارعا قامقورلىق، كەدەرگىسىز ورتا قۇرۋ - ءبىزدىڭ قوعام الدىنداعى ورتاق مىندەتىمىز، مەملەكەتتىڭ الەۋمەتتىك ساياساتىنىڭ ماڭىزدى باعىتى. ارنايى كىتاپحانانىڭ كەڭسە جابدىقتارى مەن برايل ارنايى تەحنيكاسىمەن جابدىقتالۋى – وقىرماندار ءۇشىن ۇلكەن مۇمكىندىك. يگى باستاماعا مۇرىندىق بولعان «Samruk-Kazyna Trust» قورىنا جانە «كەمەلدى قادام» قوعامدىق قورىنا العىس بىلدىرەمىز” - دەدى سەمەي قالاسىنىڭ اكىمى نۇربول نۇرساعاتوۆ.
ارنايى كىتاپحانا بۇگىندە 1000-عا جۋىق وقىرمانعا قىزمەت كورسەتەدى.
«كىتاپحانامىزدى جاڭا زاماناۋي جابدىقتارمەن جاڭارتۋدىڭ ماڭىزدىلىعى وتە زور. برايل جۇيەسى بويىنشا قۇجاتتاردى (كىتاپتاردى) شىعارۋعا ارنالعان جابدىقتاردىڭ جيىنتىعى ءبىز ءۇشىن ەرەكشە قۇندى. ەندى ءبىز بالالارعا تاكتيلدى گرافيكالىق سۋرەتتەرمەن كوركەمدەلگەن مەملەكەتتىك تىلدەگى تانىمال بالالار ادەبيەتىن وقۋعا مۇمكىندىك جاساي الامىز»، - دەدى ارنايى كىتاپحانا ديرەكتورىنىڭ مىندەتىن اتقارۋشى گۇلنار گافياتۋللينا.
قايىرىمدىلىق جوباسى اياسىندا «Samruk-Kazyna Trust» قورىنىڭ قارجىلاي قولداۋىمەن 2024 جىلدىڭ سوڭىنا دەيىن، سەمەيدە زاعيپ جانە ناشار كورەتىن ازاماتتارعا ارنالعان تاۋەلسىز قازاقستانداعى تۇڭعىش ارنايى تيپتىك كىتاپحانانى سالۋ جوسپارلانۋدا. بۇل وسىنداي سيپاتتاعى العاشقى جانە جالعىز مادەني مەكەمە بولماق.
