مەملەكەت باسشىسى قاسىم-جومارت توقاەۆتىڭ اتىنان ۇلتتىق قۇرىلتاي قاتىسۋشىلارىنا اۋىزاشار بەرىلدى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
اتىراۋداعى اۋىزاشاردا پرەزيدەنت جينالعان قاۋىمدى قاسيەتتى رامازان ايىمەن قۇتتىقتاپ، ولارعا ۇلتتىق قۇرىلتاي جۇمىسىنا بەلسەندى اتسالىسقانى ءۇشىن ريزاشىلىعىن ءبىلدىردى. سونىمەن قاتار ول ورازاعا تۇسپا-تۇس كەلگەن بيىلعى جيىننىڭ ءمان-ماڭىزى ەرەكشە ەكەنىن اتاپ ءوتتى.
– بارشا مۇسىلمان قاۋىمى رامازان ايىن اسىعا كۇتەدى، وسى قاسيەتتى ايدا ەڭ اسىل تىلەكتەرىن تىلەپ، دۇعالارىن جاسايدى. جۇرتشىلىق يمانىن كۇشەيتىپ، رۋحاني تازارادى. ازاماتتارىمىز مۇقتاج جاندارعا كومەكتەسەدى، باسقا دا يگى امالدار جاسايدى. مۇنداي قادامدار، تۇپتەپ كەلگەندە، ءار ادامعا، ءار شاڭىراققا بەرەكە اكەلەدى. سول ارقىلى ەلىمىزدىڭ ىنتىماعى ارتا تۇسەدى، – دەدى ول.
قاسىم-جومارت توقاەۆ يسلام ءدىنىن ءتول مادەنيەتىمىزدىڭ اجىراماس بولىگى ەكەنىن ايتىپ، اتا ءدىنىمىزدىڭ ادامزاتتى مەيىرىمدى، ادال، ءبىلىمپاز جانە ەڭبەكقور بولۋعا ۇندەيتىنىن جەتكىزدى.
– وسى اسىل قاسيەتتەر حالقىمىزدىڭ سالت-داستۇرىنەن دە ايقىن كورىنەدى. وزدەرىڭىزگە ءمالىم، مەن ۇلتتىڭ جاڭا ساپاسىن قالىپتاستىرۋ تۋرالى ۇنەمى ايتىپ ءجۇرمىن. قۇرىلتاي كەزىندە دە ايتتىم. ەلىمىزدىڭ ءاربىر تۇرعىنى ناعىز «ادال ازامات» بولۋى كەرەك. ءبىز جاس ۇرپاقتىڭ بويىنا ۇدايى جاقسى قاسيەتتەردى سىڭىرە بەرۋىمىز قاجەت، – دەدى پرەزيدەنت.
مەملەكەت باسشىسىنىڭ ايتۋىنشا، وزىق ەل بولۋ ءۇشىن ازاماتتارىمىزدىڭ مىنەز-قۇلقى، ءىس-ارەكەتى، ويى، نيەتى – ءبارى دە سوعان ساي بولۋى كەرەك. بۇل ورايدا جاستارعا ادال ەڭبەكپەن تابىسقا جەتۋ قاجەتتىگىن ءتۇسىندىرۋ، ەل اعالارىنىڭ ومىرلىك تاجىريبەسىن ۇيرەتۋ وتە ماڭىزدى.
