جەتىسۋ وبلىسىندا جىل باسى – ءاز-ناۋرىز مەيرامىنىڭ قارساڭىندا ناۋرىزنامانىڭ ونكۇندىگى شەڭبەرىندە مادەنيەت جانە ۇلتتىق سالت-ءداستۇر كۇنىنە وراي, «تۇساۋ كەسۋ» ءراسىمى وتكىزىلءدى. ۇيىمداستىرۋشىلار ءبىر ۋاقىتتا 50 ءبۇلدىرشىننىڭ تۇساۋىن بىرگە كەسىپ، قازاقستاندىق رەكورد ورناتتى. اتاۋلى كۇندە ۇلكەن ومىرگە العاشقى قادامىن جاسايتىن بالالاردىڭ ىشىندە وبلىستىڭ تۇكپىر-تۇكپىرىنەن ارنايى كەلگەن بۇلدىرشىندەر دە بار. ءداستۇردى ورىنداپ، بالالاردىڭ تۇساۋىن كەسۋگە جەتىسۋ وبلىسىنىڭ اكىمى بەيبىت يساباەۆ جانە وڭىردەگى مادەنيەت جانە سپورت قايراتكەرلەرى، ارداگەرلەر كەڭەسىنىڭ مۇشەلەرى, وبلىستىق ماسليحات دەپۋتاتتارى قاتىستى.
اتالمىش شاراعا ارنايى كەلگەن «قازاقستاندىق اقپاراتتىق-ەنتسيكلوپەديالىق انىقتاماسىنىڭ» رەكوردتاردى تىركەۋ دەپارتامەنتىنىڭ ديرەكتورى باقىتجان تاستۇلەكوۆ رەكورد ورناعانى تۋرالى سەرتيفيكاتتى سالتاناتتى تۇردە تابىستادى. «بۇگىنگىدەي 50 بالانىڭ تۇساۋ كەسۋ ءراسىمى قازاقستاندا ءالى بولماعان. سول سەبەپتى، ءبىز وسى شارانى قازاقستاندىق رەكورد رەتىندە تىركەپ، قازاقستان اقپاراتتىق-ەنتسيكلوپەديالىق انىقتامالىعىنا ەنگىزدىك» – دەيدى باقىتجان ءسابيتۇلى. ايتا كەتەيىك، قازاقستان رەكوردتار كىتابى 1999 جىلدان باستاپ جارىق كورەدى.
