«قازتەمىرترانس» كومپانياسىنىڭ ءۇش قىزمەتكەرى مەن 16 كاسىپكەر پارا العانى ءۇشىن سوتتالدى، دەپ حابارلايدى ”ادىرنا” ۇلتتىق پورتالى باس كولىك پروكۋراتۋراسىنىڭ ءباسپاسوز قىزمەتىنە سىلتەپ.
«18 ناۋرىزدا قىلمىستىق ءىس سوتتا قارالدى. سوت ۇكىمىمەن «قازتەمىرترانس» اق ءتورت قىزمەتكەرى سىبايلاس جەمقورلىق قىلمىسىن جاساعانى، اتاپ ايتقاندا پارا العانى ءۇشىن كىنالى دەپ تانىلدى. ۇشەۋى ءتۇرلى مەرزىمگە باس بوستاندىعىنان ايىرىلدى»، - دەلىنگەن حابارلامادا.
ءىس ماتەريالدارىنا سايكەس، 2019-2022 جىلدار ارالىعىندا جۇكتەردى تاسىمالداۋعا قاجەتتى ۆاگوندار تاپشىلىعى جاعدايىندا «قازتەمىرترانس» اق فيليالىنىڭ لاۋازىمدى تۇلعالارى جۇك جونەلتۋشىلەر مەن ولاردىڭ وكىلدەرىنەن جۇك تاسىمالداۋعا ۆاگونداردى كەدەرگىسىز بەرۋ ءۇشىن پارا العان.
پارا بەرگەن 16 كاسىپكەر دە كىنالى دەپ تانىلسا، ونىڭ 15-ءى ءوز كىناسىن تولىق مويىنداپ، قىلمىستىڭ اشىلۋىنا ۇلەس قوسىپ، ىستەگەن ىسىنە وكىنگەندىكتەن بوساتىلدى.
كىناسىن مويىنداماعان ءبىر كاسىپكەرگە 49 ميلليون تەڭگە كولەمىندە ايىپپۇل تۇرىندەگى قىلمىستىق جازا قولدانىلدى.
«سىبايلاس جەمقورلىق قىلمىسىن ءبىرىنشى رەت جاساعان ادامدى وكىنۋىنە بايلانىستى قىلمىستىق جاۋاپتىلىقتان تەك سوت قانا بوساتۋى مۇمكىن (قك 65-بابى), - دەپ ەسكە سالدى پروكۋراتۋرا.
