تۇركيا باسشىسى قىتاي مەن تۇركيا اراسىنداعى وشپەندىلىكتى قوزدىرۋعا جول بەرىلمەيتىنىن ايتتى
تۇركيا پرەزيدەنتى رەجەپ تايىپ ەردوعان قىتايدىڭ شىڭجاڭ-ۇيعىر اۆتونوميالىق اۋدانىنداعى ەتنيكالىق توپتاردىڭ بارلىعى باقىتتى ءومىر ءسۇرىپ جاتقانىن مالىمدەدى، دەپ حابارلادى ريا نوۆوستي.
بۇعان دەيىن تۇرىك بيلىگى قىتايدى شىڭجاڭداعى ۇيعىرلارعا قىسىم كورسەتىپ، ولاردى تۇزەتۋ لاگەرلەرىندە ماجبۇرلەپ ۇستاپ وتىر دەپ ايىپتاعان ەدى. الايدا ەردوعان قىتايعا ساپارى كەزىندە باسقاشا سويلەدى.
"قىتايدىڭ شىڭجاڭ ولكەسىندەگى بارلىق حالىق باقىتتى ءومىر ءسۇرىپ جاتىر، تۇرىك تاراپى ەشكىمگە قىتاي مەن تۇركيا اراسىنداعى وشپەندىلىكتى قوزدىرۋعا جول بەرمەيدى", - دەدى ەردوعان قحر توراعاسى سي تسزينپينمەن كەزدەسۋىندە.
ول تۇركيانىڭ راديكاليزمگە قارسى ەكەنىن جانە ساياسي سەنىم مەن قاۋىپسىزدىكتى نىعايتۋدى قولدايتىنىن ايتتى.
اقپان ايىندا تۇركيا سىرتقى ىستەر مينيسترلىگىنىڭ وكىلى حامي اكسوي قىتايدى ەتنيكالىق ۇيعىرلاردىڭ قۇقىقتارىن قۇرمەتتەۋگە جانە ولاردى كۇشتەپ قاماۋدا ۇستاۋعا ارنالعان لاگەرلەردى جابۋعا شاقىردى.
اكسوي "21-عاسىردا كونتسەنتراتسيالىق لاگەرلەردىڭ قايتادان پايدا بولۋى – بۇكىل ادامزات ءۇشىن ماسقارا" دەپ مالىمدەدى. ونىڭ ايتۋىنشا، "ميلليوننان استام ۇيعىر تۇرمەلەردە جانە كونتسلاگەرلەردە كۇشتەپ ۇستاۋ، ازاپتاۋ جانە يدەولوگيالىق وڭالتۋ ساياساتىمەن بەتپە-بەت كەلگەن".
قىتاي سىرتقى ىستەر مينيسترلىگى بۇل مالىمدەمەنى "جيىركەنىشتى" دەپ اتاپ، نارازىلىق ءبىلدىردى. ناۋرىز ايىنىڭ باسىندا قىتايدىڭ تۇركياداعى ەلشىلىگى وسى مالىمدەدەن كەيىن قىتايدىڭ يزميردەگى باس كونسۋلدىعىن ۋاقىتشا جاباتىنىن جاريالادى.
ايتا كەتەيىك، بۇعان دەيىن قىتايدا مىڭعا جۋىق ەتنيكالىق قازاق ساياسي تاربيەلەۋ لاگەرلەرىندە وتىرعانى حابارلانعان ەدى. قازاقستان سىرتقى ىستەر مينيسترلىگى ولاردى بوساتۋ جۇمىستارىن جۇرگىزىپ جاتىر جانە قازاقستان ازاماتتىعىن الىپ، تاريحي وتانىنا ورالۋعا كومەكتەسۋدە.
قىتايدا 1,5 ميلليوننان استام ەتنيكالىق قازاق تۇرادى.
Sputnik
