22 ناۋرىز — بۇكىل مۇسىلمان ەلى بولىپ جاڭا جىلدى تويلايتىن مەرەكە كۇنى. بۇل كۇنى كۇن مەن ءتۇن تەڭەلىپ، جەر بەتى بۋسانىپ، قار تىگىسىنەن سوگىلىپ، الەمگە جاسىل القاپ ورانعان تىرشىلىك كەلەدى. اعايىن-جۇرت ءبىر-ءبىرىن قوناققا شاقىرىپ، قول الىسادى، ءتوس قاعىستىرىپ، ىنتىماققا شاقىرادى.
پارسىشا «ناۋرىز» ءبىرىنشى ايدىڭ ءبىرىنشى كۇنى دەگەندى بىلدىرەدى. بۇل ايدى سوعدالىقتار «ناۋسارىز»، حورەزمدىكتەر «ناۋساردجي»، ارمياندار «ناۆاساردي»، چۋۆاشتار «نوراس-وياحە» دەپ اتاعان.
ۇلىستىڭ ۇلى كۇنى كەڭەس زامانىندا تالاي جىلدار بويى ءدىني مەرەكە دەپ سانالدى. سوڭعى رەت 1926 جىلى تويلانعان ناۋرىز مەيرامى قازاقستاندا 1990 جىلداردىڭ باسىندا قايتادان رەسمي تۇردە اتالا باستادى. 2001 جىلى ناۋرىز مەيرامى مەملەكەتتىك مەرەكە رەتىندە جاريالاندى.
بيىل مادەنيەت جانە اقپارات مينيسترلىگى ناۋرىز مەيرامىن تويلاۋدىڭ تۇجىرىمداماسىن جاريالادى. وندا ۇلىستىڭ ۇلى كۇنىنىڭ جاڭا فورماتتا تويلاناتىنى كورسەتىلگەن. بۇدان بىلاي ەلىمىزدە جىل سايىن 14-23 ناۋرىز ارالىعىندا ناۋرىزناما ونكۇندىگى وتكىزىلەدى.
ناۋرىزنامانىڭ باعدارلاماسى:
14 ناۋرىز كۇنى – كورىسۋ كۇنى-امال مەرەكەسى تويلانادى. بۇل ءداستۇر نەگىزىندە ەلىمىزدىڭ باتىس وڭىرلەرىندە ساقتالعان. بۇگىنگى كۇنى اتالعان مەرەكەنى بارلىق ايماقتاردا تويلاۋ ۇسىنىلدى.
15 ناۋرىز – قايىرىمدىلىق كۇنى. بۇل كۇن ەل بويىنشا قايىرىمدىلىققا، مەيىرىم مەن تاتۋ كورشىلىككە ارنالادى.
16 ناۋرىز – مادەنيەت جانە ۇلتتىق سالت-ءداستۇر كۇنى. ول كۇنى قازاقتىڭ مادەنيەتى، ونەرى مەن ۇلتتىق قۇندىلىقتارى كەڭىنەن ناسيحاتتالادى.
17 ناۋرىز – شاڭىراق كۇنى. وسى كۇنى وتباسىلىق قۇندىلىقتارىمىزدى دارىپتەۋگە، ونەگەلى ۇرپاق تاربيەلەگەن ۇلگىلى وتباسىلارعا ارنالعان مادەني ءىس-شارالار وتەدى.
18 ناۋرىز – ۇلتتىق كيىم كۇنى. قازاقتىڭ ۇلتتىق كيىمدەرىن ناسيحاتتاۋعا ارنالعان ءتۇرلى ءىس-شارالاردى وتكىزۋ ۇسىنىلىپ وتىر.
19 ناۋرىز – جاڭارۋ كۇنى. وسى كۇنى كوكتەمگى اعاش ەگۋ ءداستۇرىن جالعاستىرۋ ۇسىنىلدى.
20 ناۋرىز – ۇلتتىق سپورت كۇنى. بۇل كۇنى ەلدىڭ بارلىق ايماقتارىندا ۇلتتىق سپورتتان ءتۇرلى جارىستار ۇيىمداستىرىلادى.
21 ناۋرىز – ىنتىماق كۇنى. بۇل كۇننىڭ يدەياسى – جالپى حالىق ءبىر-بىرىنە دەگەن سىي-قۇرمەتتەرىن ارتتىرىپ، تاتۋلىق پەن بىرلىكتى ناسيحاتتاۋ بولىپ تابىلادى.
22 ناۋرىز – جىل باسى. بۇل كۇنى ەلىمىزدىڭ بارلىق وڭىرلەرىندە جالپىحالىقتىق مادەني-سپورتتىق ءىس-شارالار وتكىزىلىپ، ءستيلدى ەتنواۋىلدار مەن ءتۇرلى جارمەڭكەلەر ۇيىمداستىرىلادى.
ال ناۋرىزنامانىڭ قورىتىندى كۇنى، جاڭا جىلدى قارسى الۋدىڭ سيمۆولى رەتىندە 23 ناۋرىز – تازارۋ كۇنى دەپ جاريالاندى. بۇل كۇنى قازاقستاننىڭ بارلىق ايماقتارىندا جالپىۇلتتىق ەكولوگيالىق اكتسيا وتەدى.
