ماسكەۋدەگى Crocus City Hall عيماراتىندا بولعان تەراكتىگە قاتىسى بار دەگەن كۇدىكپەن تاجىكستاننىڭ ەكى ازاماتى ۇستالدى، دەپ حابارلايدى “ادىرنا” ۇلتتىق پورتالى Baza-عا سىلتەپ.
«بريانسك وبلىسىندا Crocus City Hall عيماراتىنا شابۋىل جاسادى دەگەن ەكى كۇدىكتى ۇستالدى. قىلمىسكەرلەر مىنگەن كولىك بەلارۋس جانە ۋكراينا شەكاراسىنان بىرنەشە شاقىرىم جەردەگى تەپلى اۋىلىنىڭ ماڭىندا توقتاتىلدى. الدىن الا مالىمەت بويىنشا، كولىكتە التى ادام بولعان: ەكەۋى ۇستالدى، تاعى تورتەۋى قاشىپ ۇلگەرگەن. ۇستالعاندار تاجىكستان ازاماتتارى بولىپ شىقتى. قازىر ولارمەن قاۋىپسىزدىك قىزمەتىنىڭ قىزمەتكەرلەرى جۇمىس ىستەپ جاتىر - ولاردىڭ لاڭكەستىك ارەكەتكە قاتىسى بار-جوعى تەكسەرىلۋدە. قازىر تاعى تورتەۋى ىزدەستىرىلۋدە»، - دەلىنگەن سەنبى كۇنى تاراتقان حابارلامادا.
ەستەرىڭىزگە سالا كەتەيىك، 22 ناۋرىز كۇنى كەشكە رەسەيدىڭ كروكۋس سيتي حوللىندا بەلگىسىز بىرەۋلەر ءىرى تەراكت جاساعان بولاتىن. الدىن الا مالىمەت بويىنشا، ونداعان ادام قازا تاۋىپ، 100-دەن استامى جارالانعان. كروكۋس سيتي حوللداعى تەراكتىگە بايلانىستى قازاقستان ازاماتتارى ءۇشىن سەنىم تەلەفونى اشىلدى. پرەزيدەنت قاسىم-جومارت توقاەۆ قازاقستان اتىنان ماسكەۋدەگى كروكۋس سيتي حوللداعى لاڭكەستىك ارەكەتتى قاتاڭ ايىپتادى. ايتا كەتەيىك، ۋكراينا لاڭكەستىك ارەكەتكە قاتىسى جوقتىعىن بىردەن ءمالىم ەتتى.
بۇعان دەيىن 7 ناۋرىز كۇنى رەسەيدىڭ كالۋگا وبلىسىندا قازاقستاننىڭ ەكى ازاماتى فەدەرالدىق قاۋىپسىزدىك قىزمەتىنىڭ (فسب) ارنايى جاساق وفيتسەرلەرىمەن بولعان اتىس كەزىندە قازا تاپقان بولاتىن.
