قازاقستان سىرتقى ىستەر ءمينيسترى اقش مەملەكەتتىك حاتشىسىمەن كەزدەستى، دەپ حابارلايدى "ادىرنا" ۇلتتىق پورتالى.
قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ ۆاشينگتونعا ساپارلادى.
قازاقستان ءسىم باسشىسى اقش مەملەكەتتىك حاتشىسى ەنتوني بلينكەنمەن كەزدەسۋ وتكىزىپ، ونىڭ بارىسىندا قر-اقش ساياسي، ساۋدا-ەكونوميكالىق جانە گۋمانيتارلىق سالالارداعى كەڭەيتىلگەن ستراتەگيالىق سەرىكتەستىگىنىڭ ۇدەمەلى دامۋىن تالقىلادى.
مۇرات نۇرتىلەۋ قازاقستاننىڭ سىرتقى ساياساتىنىڭ تەڭدەستىرىلگەن سيپاتىن اتاپ ءوتىپ، وزىق امەريكالىق تەحنولوگيالاردى تارتۋ، ەكى ەل اراسىنداعى ىسكەرلىك بايلانىستاردى نىعايتۋ جانە ءوزارا ءتيىمدى ساۋدا قاتىناستارىنا قول جەتكىزۋ ارقىلى قازاقستاننىڭ كولىك-لوگيستيكالىق، ينفراقۇرىلىمدىق جانە ساۋدا-ينۆەستيتسيالىق الەۋەتىن پراگماتيكالىق ىسكە اسىرۋعا ەرەكشە نازار اۋداردى.
وتكەن جىلى ەلدەر اراسىنداعى تاۋار اينالىمى 33%-عا ارتىپ، 4 ملرد اقش دوللارىن قۇرادى. سىرتقى ساياسي ۆەدومستۆولاردىڭ باسشىلارى ەلدەر اراسىنداعى ەنەرگەتيكالىق قاۋىپسىزدىك، ماڭىزدى مينەرالدار، كليمات، بىتىمگەرشىلىك جانە ت.ب. سالالارداعى ىنتىماقتاستىققا جوعارى باعا بەردى.
اقش مەملەكەتتىك حاتشىسى پرەزيدەنت قاسىم-جومارت توقاەۆتىڭ تۇبەگەيلى وزگەرىستەر باعدارلاماسىنىڭ دايەكتى جانە جۇيەلى سيپاتىن قۇپتاپ، ۆاشينگتوننىڭ ولاردى پراكتيكالىق ىسكە اسىرۋعا جان-جاقتى جاردەم كورسەتۋدى جالعاستىرۋعا دايىندىعىن اتاپ ءوتتى. ەنتوني بلينكەن "امەريكا قۇراما شتاتتارى قازاقستاننىڭ كوپتەگەن جاھاندىق ماسەلەلەردەگى شىنايى كوشباسشىلىعىن مويىندايدى" دەپ اتاپ ءوتتى.
سونىمەن بىرگە، تاراپتار "C5+1" ديالوگىن كەڭەيتۋ جانە وتكەن جىلدىڭ قىركۇيەك ايىندا نيۋ-يورك قالاسىندا وتكەن وسى فورماتتاعى العاشقى ءسامميتتىڭ ۋاعدالاستىقتارىن ىسكە اسىرۋ ماسەلەلەرىن تالقىلادى. كەزدەسۋ سوڭىندا تاراپتار ەكىجاقتى كۇن تارتىبىندەگى بارلىق وزەكتى ماسەلەلەر بويىنشا ديالوگتى جالعاستىرۋعا كەلىستى.
بۇعان دەيىن، مەملەكەت باسشىسى قاسىم-جومارت توقاەۆ اقش سەناتورى ستيۆ دەينستى قابىلداعان بولاتىن. قابىلداۋدا پرەزيدەنت قاسىم-جومارت توقاەۆ اقش سەناتىنىڭ مۇشەسى ستيۆ دەينسكە ءىلتيپات بىلدىرە وتىرىپ، قازاقستان مەن امەريكانىڭ ىنتىماقتاستىعى ءداستۇرلى تۇردە قارقىندى دامىپ كەلە جاتقانىن اتاپ ءوتتى.
