بۇگىن پارلامەنت ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى، لوتەرەيالار جانە لوتەرەيا قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تانىستىرىلدى، دەپ حابارلايدى "ادىرنا" ۇلتتىق پورتالى.
ءماجىلىس دەپۋتاتى ەلنۇر بەيسەنباەۆ «ۇزاق تالقىلانىپ، كوپتەن كۇتكەن» زاڭ جوباسىن 1,5 جىل كۇتكەنىن ايتادى.
«وسى كەزەڭ ىشىندە قانشاما تالقىلاۋ، قانشاما پىسىقتاۋ بولدى. قوعام دەرتىنە اينالعان بۇل ماسەلە جونىندە قوپتەگەن دەپۋتاتتىق ساۋال جولدانىپ، ارنايى وتىرىستار ۇيىمداستىرىلدى. وسىعان جاۋاپتى مەملەكەتتىك مەكەمەلەر وكىلدەرىن شاقىرىپ، تىڭداۋ دا وتكىزدىك. ەڭ باستىسى، ماجىلىستەگى بارلىق فراكتسيا وكىلدەرى وسى زاڭعا باستاماشى بولىپ وتىر.
سونىمەن بىرگە، پرەزيدەنت جانىنداعى جاستار كەڭەسىنىڭ وكىلدەرىمەن، ۇلتتىق قۇرىلتاي مۇشەلەرىمەن دە بىرگە تالقىلادىق. قوعام بەلسەندىلەرى مەن ساراپشىلاردىڭ قاتىسۋىمەن قاراستىردىق. قىسقاسى، زاڭ جوباسىنا ۇكىمەتتەن قورىتىندى الۋ وڭاي بولمادى. ادەتتە، باسقا زاڭدار بويىنشا قورىتىندىنى 1-2 اي كۇتەتىن بولساق، ال بۇل زاڭعا كەلگەندە تىم سوزىلىپ كەتتى. ەكى شاقىرىلىمداعى دەپۋتاتتىق تاجىريبەمدە وسىنشاما ۇزاق ۋاقىت بويى ۇكىمەت قورىتىندىسىن الۋدى ءبىرىنشى كورىپ وتىرمىن. دەمەك، مۇنىڭ اينالاسىندا مۇددەلى توپتار، لوببيستەر بار دەگەن ءسوز» – دەيدى ول.
دەپۋتاتتىڭ ايتۋىنشا، ويىن بيزنەسىندە ۇلكەن قاراجات اينالىپ جاتىر. ماسەلەن، بىلتىر بۋكمەكەرلىك كەڭسەلەردىڭ جىلدىق اينالىمى بەيرەسمي اقپاراتتار بويىنشا 1 تريلليون تەڭگەگە جەتكەن.
«بۇگىندە قۇمار ويىندارى جىلجىمايتىن مۇلىك نارىعىن باسىپ وزىپ، الدىڭعى ورىنعا شىققان. سوندىقتان وسىناۋ زاڭ جوباسى وتە وزەكتى ءارى قوعام ءۇشىن ماڭىزدى ەكەنى انىق. ءتىپتى بۇل ماسەلەنى ەل پرەزيدەنتى قاسىم-جومارت توقاەۆتىڭ ءوزى بىرنەشە رەت كوتەرىپ، ناقتى تاپسىرما بەردى. قاۋىپسىزدىك كەڭەسىنىڭ وتىرىسىندا دا، ۇلتتىق قۇرىلتايدا بىرنەشە رەت ەرەكشە توقتالعانىن جاقسى بىلەسىزدەر.
شىنى كەرەك، قازىرگى تاڭدا قازاقستاندا ويىنقۇمارلىق ىندەتتەي ءورشىپ، ەل قاۋىپسىزدىگىنە قاتەر توندىرە باستادى. ونىڭ باستى سەبەبى – قۇمار ويىندارىنىڭ جۇرتشىلىققا وڭاي قولجەتىمدى بولۋى جانە ونى ۇيىمداستىرۋشىلاردىڭ ينتەرنەتتەگى سايتتارىنىڭ كەڭىنەن تارالۋى.
دەرەكتەرگە جۇگىنسەك، سوڭعى ەكى جارىم جىلدا ەلىمىزدىڭ ءاربىر بەسىنشى ادامى ويىن وينايدى ەكەن نەمەسە قۇمار ويىندارىنا قانداي-دا ءبىر قاتىسى بار. 400 مىڭداي ادام ويىنعا سالىنىپ، بۋكمەكەرلىك كەڭسەلەر مەن كازينولاردىڭ تۇراقتى كليەنتىنە اينالعان. اجىراسۋلاردىڭ پايىزىنا وسى لۋدومانيا تىكەلەي سەبەپ بولىپ وتىر. تۇرمىستىق زورلىق-زومبىلىققا باراتىنداردىڭ دەنى – وسى قۇمار ويىنعا شالدىققاندار. ماسەلەن، 2022 جىلى ەلىمىزدە 3 مىڭ 676 ادام وزىنە قول جۇمساپ قايتىس بولسا، ولاردىڭ ءاربىر بەسىنشىسىنىڭ سەبەبى – لۋدومانيا»، – دەدى ول.
