قازاقستان پرەزيدەنتى قاسىم-جومارت توقاەۆ قىتايدا بۇۇ-نىڭ بۇرىنعى باس حاتشىسى پان گي مۋنمەن كەزدەستى. بۇل تۋرالى اقوردا مالىمدەدى، دەپ حابارلايدى “ادىرنا” ۇلتتىق پورتالى.
«مەملەكەت باسشىسى بۇۇ-نىڭ سەگىزىنشى باس حاتشىسى، بواو ازيا فورۋمىنىڭ توراعاسى، جاھاندىق جاسىل ءوسۋ ينستيتۋتى (GGGI) اسسامبلەياسىنىڭ پرەزيدەنتى پان گي مۋنمەن كەزدەستى»، - دەلىنگەن بەيسەنبى كۇنى حابارلامادا.
پان گي مۋنعا بواو فورۋمىنا قاتىسۋعا شاقىرعانى ءۇشىن العىس بىلدىرە وتىرىپ، توقاەۆ ونىڭ بۇۇ باس حاتشىسى رەتىندەگى الەمدىك قوعامداستىق الدىنداعى ەلەۋلى قىزمەتتەرىن اتاپ ءوتتى.
« مەنىڭ پىكىرىمشە، ءسىز بىرىككەن ۇلتتار ۇيىمى تاريحىنداعى ەڭ ۇزدىك باس حاتشىلاردىڭ ءبىرى رەتىندە قىزمەت ەتتىڭىز. ەكى جارىم جىل ءسىزدىڭ جەتەكشىلىگىڭىزبەن جۇمىس ىستەۋ مەن ءۇشىن كەرەمەت كەزەڭ ءارى زور مارتەبە بولدى»، – دەدى پرەزيدەنت.
ءوز كەزەگىندە پان گي مۋن قاسىم-جومارت توقاەۆتىڭ حالىقارالىق ىنتىماقتاستىقتى دامىتۋعا ەلەۋلى ۇلەس قوسقانىن ايتتى.
«ءسىز قازاقستان پرەزيدەنتى رەتىندە وڭىردەگى بەيبىتشىلىك پەن كەلىسىمدى ساقتاۋعا، ادامزات پەن بۇۇ-نىڭ مۇمكىندىكتەرىن كەڭەيتۋگە بەلسەندى اتسالىسىپ كەلەسىز. مەنىڭ ويىمشا، قازاقستان شىعىس پەن باتىس اراسىنداعى اسا ماڭىزدى كوپىر ءرولىن اتقارىپ وتىر. ءسىز شىعىس پەن باتىستىڭ احۋالىن جاقسى تۇسىنەسىز. بۇل رەتتە تاجىريبەڭىز مول”، – دەدى كورەيا ديپلوماتى.
كەزدەسۋدە حالىقارالىق كۇن تارتىبىندەگى وزەكتى ماسەلەلەر، ونىڭ ىشىندە بۇۇ-نىڭ جاھاندىق سىن-قاتەرلەردى ءتيىمدى ەڭسەرۋدەگى ءرولى تالقىلاندى.
«پرەزيدەنت قازاقستاننىڭ حالىقارالىق باستامالارى تۋرالى ايتتى. باس اسسامبلەيانىڭ 79-سەسسياسى اياسىندا قازاقستان فرانتسيامەن بىرلەسىپ «ءبىر سۋ» ءسامميتىن وتكىزۋدى جوسپارلاپ وتىر. سونىمەن قاتار، 2026 جىلى استانادا ايماقتىق كليماتتىق سامميت ۇيىمداستىرىلادى. مەملەكەت باسشىسى پان گي مۋندى باستى سپيكەرلەردىڭ ءبىرى رەتىندە الداعى استانا حالىقارالىق فورۋمىنا قاتىسۋعا شاقىردى»، - دەپ تولىقتىردى اقوردا.
ايتا كەتسەك، پان گي مۋن – 2007 جىلعى 1 قاڭتار – 2016 جىلعى 31 جەلتوقسان ارالىعى بۇۇ-نىڭ 8-ءشى باس حاتشىسى بولدى. 2011 جىلعى ناۋرىزدا توقاەۆ بۇۇ باس حاتشىسىنىڭ ورىنباسارى، بۇۇ-نىڭ جەنەۆاداعى بولىمشەسىنىڭ باس ديرەكتورى، سونداي-اق بۇۇ باس حاتشىسىنىڭ قارۋسىزدانۋ جونىندەگى كونفەرەنتسياداعى جەكە وكىلى بولعان بولاتىن.
