قازاقستان پرەزيدەنتى Sany Group Co. Ltd ديرەكتورلار كەڭەسىنىڭ توراعاسى سيان ۆەنبونى قابىلدادى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
كەزدەسۋ بارىسىندا قاسىم-جومارت توقاەۆ پەن سيان ۆەنبو «جاسىل» ەنەرگەتيكا سالاسىنداعى بىرلەسكەن جوبالاردى جۇزەگە اسىرۋ ماسەلەلەرىن تالقىلادى. كورپوراتسيا قازاقستاندا جالپى قۋاتى 1گۆت جەل ەلەكتر ستانتسياسىن سالۋ جوباسىن جۇزەگە اسىرۋعا قاتىسىپ جاتىر جانە جاڭارتىلاتىن ەنەرگيا كوزدەرىنە ارنالعان مۇنارا، قالاق جانە گوندولا قۇراستىراتىن زاۋىت سالۋ مۇمكىندىگىن قاراستىرۋدا.
مەملەكەت باسشىسى قازاقستاننىڭ Sany Group Co. Ltd كومپانياسىمەن اراداعى ىقپالداستىقتى ودان ءارى نىعايتۋعا مۇددەلى ەكەنىنە نازار اۋداردى. اتاپ ايتقاندا، ەلىمىزدە ارناۋلى تەحنيكالار، سونداي-اق ولاردىڭ قوسالقى بولشەكتەرىن شىعاراتىن بىرلەسكەن ءوندىرىستى جولعا قويۋ پەرسپەكتيۆتى سانالادى.
قىتاي كومپانياسىنا قازاقستاندا ايماقتىق R&D ورتالىعىن اشۋ مۇمكىندىگىن قاراستىرۋ ۇسىنىلدى. بۇل ورتالىق كومپانيانىڭ ەاەو نارىعىنداعى قىزمەتىن ىلگەرىلەتۋگە سەپتىگىن تيگىزەدى.
قاسىم-جومارت توقاەۆ سيان ۆەنبونى بيىل ەلىمىزدە وتەتىن استانا حالىقارالىق فورۋمىنا قاتىسۋعا شاقىردى.
